【台語世界／錄音】Bùn血ê夜明珠

有天星ê所在就有伊
伊是東方ê夜明珠
M̄是新婦仔囝

夜明珠la̍k tī習皇帝ê手頭
Soah hiông-hiông bùn血
血水phùn tī烏警ê身軀頂
烏警仝款心肝掠坦橫
先強姦chiah thūn海
Hām銃子mā khiām--起來
大樓kha lóng是陳文成ê形影
烏警講he lóng無他殺ê嫌疑

東方ê Hollywood
香港舞台tng teh poaⁿ1947年台灣228 ê悲劇
民主hām獨裁ê距離無遠
Kan-taⁿ差一張選票
獨裁者禁止人民卦喙罨
烏警soah家己khàm頭khàm面
Kō͘胡椒水、催淚彈hām銃子對付
Gia̍h雨傘ê人民

雨傘teh遮民主ê ǹg-bāng
喙罨teh顧自由ê芳味
銃子chǹg thàng人民ê肉体
Thàng bē過in ê決心
天公伯à mā khiā tī香港chit pêng
送hō͘北京政權「武漢肺炎」

有天星ê所在就有伊
伊是天頂上súi hit粒星

台灣字（白話字）版
Bùn Hoeh ê Iā-bêng-chu
Bûn/ Chiúⁿ Ûi-bûn
lio̍k-im/ Tân Kim-hoa
Ū thiⁿ-chhiⁿ ê só͘-chai tō ū i
I sī Tang-hong ê iā-bêng-chu
M̄-sī sim-pū-á-kiáⁿ

Iā-bêng-chu la̍k tī Si̍p hông-tè ê chhiú-thâu
Soah hiông-hiông bùn hoeh
Hoeh-chúi phùn tī o͘-kéng ê sin-khu-téng
O͘-kéng kāng-khoán sim-koaⁿ lia̍h thán-hoâiⁿ
Seng tiong-kan chiah thūn hái
Hām chhèng-chí mā khiām--khí-lâi
Tōa-lâu-kha lóng sī Tân Bûn-sêng ê hêng-iáⁿ
O͘-kéng kóng he long bô thaⁿ-sat ê hiâm-gî

Tang-hong ê Hollywood
Hiong-káng bú-tâi tng teh poaⁿ 1947 nî Tâi-oân 228 ê pi-kio̍k
Bîn-chú hām to̍k-chhâi ê kū-lî bô hn̄g
Kan-taⁿ chha 1 tiuⁿ soán-phiò
To̍k-chhâi-chiá kìm-chí jîn-bîn kòa chhùi-am
O͘-kèng soah ka-tī khàm thâu khàm bīn
Kō͘ hô͘-chio-chúi, chhui-lūi-tôaⁿ hām chhèng-chí tùi-hù
Gia̍h hō͘-sòaⁿ ê jîn-bîn

Hō͘-sòaⁿ teh jia bîn-chú ê ǹg-bāng
Chhùi-am teh kò͘ chū-iû ê phang-bī
Chhèng-chí chǹg thàng jîn-bîn ê bah-thé
Thàng bē kòe in ê koat-sim
Thiⁿ-kong-peh--á mā khiā Hiong-káng chit pêng
Sàng hō͘ Pak-kiaⁿ chèng-koân “Bú-hàn Hì-iām”

Ū thiⁿ-chhiⁿ ê só͘-chai tō ū i
I sī thiⁿ-téng siōng súi hit lia̍p chhiⁿ

讀hōo你聽：

文章屬作者個人意見，文責歸屬作者，本報提供意見交流平台，不代表本報立場。