【少女Tech】IOS13即將登場 4個實用新功能必要知

仲有半個月Apple就會推出嘅IOS13 ，作為女士好多時IOS推出新版大家未必好清楚實際上有咩分別，不過由於推斷會伴隨iPhone11一齊出，所以當中新功能都有唔少，以下介紹幾個對女士們會有實際作用嘅新Function，大家留意喇。

1) 唔會再唔記得密碼：Apple登入

一部電話幾十個App，加埋唔同網站，你數唔數到自己有幾多個帳戶？每個帳戶又要登入名稱及密碼，相信係唔少女生嘅惡夢。IOS13會推出「Sign In With Apple」功能，即係只係用Face ID、Touch ID就可以開晒所有電話入面嘅帳戶登入，唔需要再擔心唔記得密碼！Apple強調唔會用大家嘅密碼使用你嘅資料或者用你嘅行為進行分析，唔怕無晒私隱啦。

2) 連續手寫輸：Swype

過往Text人都要用虛擬鍵盤，今次IOS13終於有手寫英文同埋無間斷咁輸入，終於唔使用第三方軟件就支援到喇，最啱手指粗打字慢嘅女士們。不過暫時未支援中文輸入，單單只有英文咋，希望日後快手Update支援埋中文啦。

3) 護眼之寶：黑夜模式

作為手機低頭族嘅女士們，夜一夜都唔肯瞓好多時仲喺拎住部電話，千呼萬喚IOS13終於為電話推出「黑夜模式」；開啟之後所有系統介面、背面、鍵盤等都會用黑色底呈現，唔怕反光燦親眼，對眼無咁酸痛。不過都要提醒大家，咁只係令眼睛無咁疲勞，要護眼最好都係唔係關燈玩電話喇。

4) 人像模式添加黑白相：Hi-Key

最後一個新功能點少得大家最關注嘅相機呀？人像模式將會新增黑白模式Hi-Key，可以更突顯個人特徵及風格。另外大家可以一點一拉就編輯相片及影片，同時可以增加景深效果。此外仲有一個新功能，就係可以幫你將重複、Screen Cap等多餘相片隱藏，唔使怕影得太多啦！