林子超克服 4 吋高踭鞋撫媚跳唱 香港電視史上首個 Drag Queen 表演好評如潮：原來大家咁 open-minded

【Yahoo 新聞報道】「我想畀人知，一個人嘅可能性係好多」，現年 32 歲、無綫藝員林子超（Andy）說到做到。他由《宮心計 2 深宮計》中飾演心狠手辣的太醫仔，搖身變成為電視史上首個 Drag Queen，表演震撼全港，日前更於無綫台慶夜再度亮相，好評如潮。Andy 接受《Yahoo 新聞》訪問時指，Drag Queen 表演值得在香港佔更重要席位，由學踏高踭練到勁歌熱舞，僅花了一個月時間，「好想同大家講，任何表演藝術都值得欣賞，畀人知道 being different is okay and cool」。

文字記者：盧珮瑤

攝影記者：HLKP

林子超早前以《全城一叮》總台柱身份，再度化身 Drag Queen 登上無綫 55 周年台慶舞台表演。他以閃亮華造型登場大唱《Poker Face》、《Bad Romance》等舞曲，更需邊表演邊卸妝，最終以真面目示人。「我好感恩《全》畀咗呢啲機會我」。

哪裡有壓迫 哪裡就要有 Drag Queen

Andy 於香港演藝學院主修現代舞，隨後遠赴新加坡進修音樂劇。回港後獲無綫前戲劇總監梅小青賞識，參演《宮心計 2 深宮計》太醫仔茗風一角為人認識，4 年前簽約加入無綫。做變裝皇后源於無綫節目《全城一叮》，「呢個節目擺明係一個大膽嘅節目，除咗表現talent（才華）之外，係畀你講一啲從來無人講過嘅訊息」。從面試起，他已決定做皇后震撼觀眾，「公司係 fully support（全力支持），我都好感恩」。

比賽中 Andy 化身成 DIVA，撫媚跳唱《Crashing》，成本港電視史上首個 Drag Queen 表演。他指，Drag Queen 於外國不同界別佔有重要席位，香港卻不然，「電視好多男扮女裝，但本質係綜藝，認真去做 Drag 嘅係無，但我覺得好需要，呢個表演藝術好值得去 appreciate（欣賞）」。

要衝擊的，除了電視節目，還有社會壓迫。Andy 準備表演期間，重溫美國變裝電視節目《魯保羅變裝皇后秀》（Rupaul’s Drag Race）選手的訪問，發現不少人小時候都曾被排斥、欺凌，以變裝學懂擁抱自己。Andy 生命中亦有同樣傷痕，他自小患上心漏不宜做運動，哨牙外型亦常被同學取笑，「『哨牙仔』、『死乸型』係陪住我中學成長嘅 trademark（標記），加上我唔係好高，以前年代更加唔啱做 artist（藝人）」。變裝表演成為解放，「Drag Queen 就係要 wild（狂野）要 loud（放大），放到最大先知自己個可能性，華人社會成日壓迫你話『唔可以咁』，但你永遠唔會知『原來你可以咁』」。

觀眾激讚：多謝你唔係醜化女人

表演後回首，他笑稱「我發現自己無嘢做唔到！」《全》比賽共分兩個回合，他均向高難度挑戰，變裝以外大跳鋼管舞，「我真係每一 round都想死！」具跳舞底子的Andy，原以為能輕鬆駕馭 Drag Queen表演，但練習甫開始已被高跟鞋「絆倒」，「我係直頭行唔到，本身對高跟鞋 12cm，一行就仆！但我係力求完美的人，唔可以求其揀對矮啲就當係，呢個唔 convincing（有說服力）」。Andy 最終以 10cm（4吋）高跟鞋應戰，在備戰的一個月，他每天均要到排舞室練習走路，亦要上高跟鞋課，學習人鞋合一。

Andy首次試妝花了 4 小時，Drag Queen 妝容步驟極多，打底要下雙重功夫，「你個妝要好厚同要 keep（維持）好耐，所以皮膚要保持極度滋潤」。亦要遮蓋男性面容特徵，「要用膠水痴咗條眉再上粉，其實係由你本身面型上，重新塑造過另一個面型」。Drag Queen 服裝非常貼身，Andy 穿上模仿女性陰部的「偽娘內褲」，藏起男性性器官。

認真做好一件事，自然受人垂青。Andy 坦言曾擔心觀眾的接受程度，好評如潮令憂慮一掃而空，「有個留言係『好多謝你唔係醜化女人，而係將呢個藝術表現出嚟』，嗰刻覺得好 powerful（有力量），有啲嘢你唔做唔會知原來大家咁open-minded（開明）」。

鋼管舞展現 10cm 心漏手術疤痕

Andy 第二回合比賽繼續高舉衝擊性別定型旗幟，大騷胸肌跳鋼管舞，「你以為好女仔嘅一樣嘢其實都可以masculine（男性化），我想畀大家多個 suggestion（建議），對性別定義有多個睇法」。Andy在表演加插高難度動作，如只用大腿夾實鋼管，形成凌空坐姿，「練嗰陣全身瘀到腫，手震到電話都拎唔起」。

是次表演中，Andy 以一段獨白開場：「我同你都有不同過去，我哋要為自己感到驕傲同自豪」。Andy十多年前曾做心漏手術，胸口留下10cm疤痕，「我其實好貪靚，但做完手術之後好無自信，唔敢去游水、去沙灘，po相都會P走條疤」。不過，他選擇在舞台上首次展現疤痕，以及最真實的自己，「而家睇返都覺得好大膽，但一定要試，嗰個係一個接受自己嘅開始」。