Yahoo奇摩新聞 【電影LOL．外語930】影后前傳 那些年Emma Stone少少咸多多趣嘅校園喜劇
一心諗住停夠14日，香港各大戲院有望星期六復工，可惜剛剛宣布為保持社交距離，不能聚集4人或以人，所以部份場所包括美容院、髮型屋以及戲院都唔可以開門做生意直至4月23日！怕且措施會繼續延長，唯有留喺屋企睇戲煲劇！
今日想同大家介紹2部由金像影后Emma Stone主演嘅舊作，分別為《校園兔女郎》(The House Bunny) 及《Easy A》（台譯：《破處女王》）。回到未紅時嘅Emma拍落唔少青春校園喜劇，佢通常都係做少少mean、未至於係校花但又未至於毒L嘅角色。礙於片種關係，兩套戲當年都無喺香港上映，但其實賤賤地又幾好笑，難得串流平台有齊2套戲，呢個周末不妨睇睇！
《校園兔女郎》係2008年作品，女主角係美劇《極品老媽》(Mom)嘅Anna Faris，講述佢飾演嘅Shelly原本係Playboy女郎，住喺Playboy大宅，日日著住件三點式行嚟行去，無咩工作技能！有日收到大信封話佢27歲已經老而被請出Playboy大宅，玩盡金髮大波無腦形象嘅Shelly誤打誤撞去到極不受歡迎嘅大學姊妹會宿舍，喺裡面住嘅幾位騎呢女學生正煩惱如何吸引新人加入，決定請Shelly做舍監教佢地變身做索女開party，寄望憑此成為校園大熱院舍。
Emma Stone 飾演其中一位騎呢女學生，有腦讀書又唔差，不過見到異性就失控，暗戀人又唔識表達，經Shelly指點後大膽咗又自信咗，著衫仲性感咗添！套戲笑位比較集中喺Shelly身上，例如佢諗住扮夢露吹起條裙結果出意外、俾人查牌又會錯意等，呢啲位都幾好笑！當然，套戲明笑世界以貌取人極膚淺，最後都係想表達內在比外在緊要，做人最重要係忠於自我啦！
另一套2010年推出嘅Easy A就真係由Emma Stone擔正主演，戲內飾演Olive本來係初吻都無試過嘅高中生，不過因為抵受唔住八婆同學嘅壓力，亂吹自己有個大學男友仲已經試過翻雲覆雨，激情四射咁話。結果謠言就此四起，成為校內熱話，加上衰心軟幫個基基同學扮直，於派對上扮搞嘢，從此成為校內性愛女皇！
其實仲係處女嘅佢，亂吹同無自信、被人蝦嘅男同學們搞嘢，等佢地可以喺班friend面前吹水攞彩！事件越滾越大，女同學藐佢淫蕩、男同學以為佢隨便，連自己個死黨都誤會佢，所以Olive索性一不做二不休，日日谷胸著小背心、心口掛住代表姦淫（Adultery）嘅A字返學！
叫得做校園喜劇，當然唔少得真正了解佢又靚仔嘅真命天子Todd（由《安眠書店》男主角Penn Badgley飾演），最後Olive決定為自己澄清而進行直播，講返成件事嘅來龍去脈！
戲好笑在Emma Stone對白夠mean，面對成日將主掛喺口邊、實際心地麻麻仲話「俾全能嘅人審判」嘅質疑，佢簡單一句「全能嘅人？湯告魯斯？」窒到應一應就已經好值得睇！
更多電影文章
【電影LOL．疫情影響】新片全線改期 本地戲院轉陣放映經典名片
【電影LOL．疫情影響】骨牌效應 迪士尼Marvel全線大片改期上映
