電影LOL︳《上流寄生族》導演奉俊昊新作Mickey 17 2024年3月先有得睇

韓國導演奉俊昊2年前打破奧斯卡紀錄,作品《上流寄生族》成為首套奪得最佳影片嘅非英語電影。之後由於新冠疫情,影迷靠串流平台睇戲,同時開闊埋眼界,令到韓國、日本等地嘅作品都漸漸成功打入西方市場。劇集《魷魚遊戲》、日本片《Drive My Car》都喺亞洲以外地區打出名堂。

至於奉俊昊就正在製作自編自導新作Mickey 17,會係佢第三套荷里活作品。電影改編自年初推出嘅小說Mickey 7,講述人類派探險隊上去被殖民嘅星球。而探險隊成員之一Mickey 7專被委派做危險任務,一旦出事冇命,探險隊會複製下一個Mickey,仲會輸入返舊版嘅記憶。喺任務中獲救嘅Mickey 7,返回被殖民嘅星球時先知,自己一早被當成殉職,團隊已經整咗Mickey 8出來。但根據規定,如果有2個相同嘅複製人,就要2個都消滅。

Robert Pattinson
Robert Pattinson

Mickey 7會點樣保住自己條命?究竟點解小說係Mickey 7,電影又會變成Mickey 17?呢個懸念夠晒引人入勝,睇完小說嘅都會想知。

片商星期一公布咗Mickey 17嘅預告片,只係見到男主角Robert Pattinson好似瞓喺照磁力共振嘅機器入面咁,配以古典音樂,創造出未來感之餘亦令人有兩分緊張。而且細心一睇,「17」個7字上面嗰一畫原來係電池,仲寫住「18」,係咪有咩玄機?

Mickey 17 故事亦都同奉俊昊科幻前作Okja一樣,以超現實嘅比喻引起觀眾對現世價值作出思考。Mickey 17嘅卡士仲有Toni Collette、Mark Ruffalo、Naomi Ackie同埋奉俊浩同鄉Steven Yeun。預告片仲透露,Mickey 17將會喺2024年3月29日上畫。雖然仲有一年有多先睇得,但係已經知道同Mickey 17打對台嘅會係新一套《蜘蛛俠》(Spider-Man: Beyond the Spider-Verse)。

更多電影文章

電影LOL 今期睇咩戲︳五腥級盛宴/殺神夜/肌智整容大叔/分貝恐襲/巴黎聖母院:火海奇蹟/百花

電影LOL︳《殺神夜》開畫幾日已經準備拍續集 聖誕老人繼續打打殺殺

電影LOL︳李安父子檔拍李小龍傳 大馬街頭食肉骨茶原來有玄機

電影LOL︳又係華納 製片商Legendary改與Sony合作 拉埋哥斯拉跳槽?

電影LOL︳疫情之下 內地戲院奇招自救 收錢俾打工仔入場瞓晏覺

電影LOL︳The Rock踢爆 DC本來唔想亨利卡維爾再演超人

按此下載 全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!