上屆退賽港姐江婉穎拍片大談參選過程 批評有傳媒對有口音佳麗太刻薄

《2022香港小姐競選決賽》喺日前（25日）圓滿結束，結果由8號林鈺洧成為冠軍，亞軍及季軍就由4號許子萱及14號梁超怡奪得，而13號邢慧敏則奪友誼小姐。今屆港姐有唔少佳麗來自內地，所以佢哋都係操半咸淡廣東話，有佳麗甚至要司儀多次幫忙翻譯，好似徐麟（Astrid）喺泳裝問答環節聽咗兩次都唔明條問題，要丁子朗再用國語發問，佢原本想講「天堂美食節」，不過就一度誤以為佢講「天體美食節」，成為網民熱門討論話題。而上屆退賽港姐江婉穎（Wynn）近日拍片上載到小紅書，講述參選嘅過程、退選原因及​​批評部份香港傳媒對有口音嘅佳麗太刻薄。

上屆退賽港姐江婉穎喺前日（27日）拍片上載到小紅書，首先佢就透露自己嘅參選過程，佢上年喺就讀完研究生嘅時候，受到老師鼓勵而參選港姐， 當時佢就搵咗一個朋友做提名人，而提名人唔需要有特別要求，只要了解參賽者為人同埋真心推薦佢就可以。

去到現場後，佳麗們隨即換上泳裝，畀曾志偉及TVB高層過目，喺佢哋面前轉圈展示樣貌和身材，而現場亦有兩至三部攝影機喺唔同嘅角度影佢哋，而呢個時候評判們就係睇佳麗們嘅身材是否高䠷、長相是否大氣又精緻，同埋氣質有冇親和力。

之後佳麗們就會著返平常嘅衣服，同評審們交流一下，評審們亦會問一啲問題，因為江婉穎係來自廣州嘅關係，佢就被問到「什麼時候來香港？」、「為什麼來香港？」、「平常喜歡吃什麼菜？」及「有什麼興趣愛好？」等等問題。 江婉穎認為整個交流過程唔會特別嚴格，評審們只係想考驗佳麗們嘅談吐舉止同埋廣東話發音，佢仲話如果只係憑長相過關，而廣東話嘅水平未去到正常溝通嘅話，喺之後嘅比賽環節都會被篩選下去。

之後，佳麗們會被安排與傳媒見面，佢就批評香港有部份傳媒對有口音嘅佳麗太刻薄，因為佢憶述有個佳麗係來自內地，當佢講完有口音嘅廣東話後，有傳媒就直接問佢「你係邊度鄉下？」，令佢覺得好冇禮貌。

江婉穎亦有講到自己退賽嘅原因，第一就係佢嘅審美理念與評判不符，佢憶述有個生得好靚嘅佳麗，而佢嘅身材就偏向肉感，評審們就當面批評佢太肥，一定要減肥，減唔到肥就唔好嚟啦。而第二個原因就係不滿TVB合約嘅「霸王條款」，佳麗們必須要係「零合作、零簽約」嘅狀態，不過好多佳麗們本身係KOL，所以都有合約喺身。而節目組就要求佢哋即場打電話同原本嘅公司解約，之後先可以進入比賽。而佳麗們解約仲要立即簽約，但TVB嘅合約期太長、再加上起薪不高，所以佢選擇退賽。最後，江婉穎就話今年比上年好，而粵語嘅要求降低，所以來自內地嘅參賽者亦有所增加。

影片出街後，唔少內地網民為內地佳麗抱不平，例如「今年的astrid也是，用她引流，吸了一波關注度，最後罵聲全她一個受，香港評論區就不說，小紅書我們自己同胞都可以這麼尖酸刻薄。不說別的光是參加的勇氣都值得鼓勵，五強明顯擺佢上台，還不如止步20強10強算了。」及「反正他們挺雙標的，海歸就可以粵語不行。內地人就是北姑。」等等。另外，亦有網民認為香港小姐應該要講標準廣東話，留言話「選香港小姐，又唔係選華姐，粵語準確應該係基本要求，唔係點代表香港呢？」及「廣東話差被狠批是應該的，每個行業有專業技能的要求，如果說着同樣不鹹不淡北京人都聽唔懂的普通話去CCTV面試，難道就可以接受了？」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！