中年好聲音︳12強對決上半場 梁浩銓揀錯歌被淘汰

TVB選秀節目《中年好聲音》決出12強後，以「故事之歌」作為淘汰賽主題，俾參加者每人選一個課題嚟揀歌。而出場位置就由參加者自選，次序按上集得分決定先後次序，並分成上下半場，各半場會淘汰一位選手。

第一個出場係一度被家人趕出門嘅梁浩銓。多年前梁浩銓參加過新秀，並且因此認識同樣參加比賽嘅吳浩康。梁浩銓以陳奕迅嘅《時光倒流20年》出戰，可惜反應麻麻，被評審Eric Kwok批評「你係中年，有把好聲，但係冇音」，演繹唔到歌詞嘅故事感，最終只得70分。

丁文俊21歲時參加1994年新秀歌唱大賽奪得亞軍，當屆冠軍係海俊傑。後來丁進入音樂行業，做過蘇永康助手，到三十幾歲先至同音樂人戴偉（電影《狂舞派》配樂）組成樂隊A-Day，但後來樂隊解散收場。而丁文俊亦面對生計同理想嘅抉擇，最終選擇北上謀生。但係當佢喺街頭聽到由日本來港賣唱嘅Mr.Wally演唱時，終於忍唔住爆喊。丁文俊選唱咗《交叉點》，得到5位評審合共79分，伍仲衡更大讚丁聲音有質感，而且改善咗唱主歌都太用力嘅缺點。

顏志恆選擇「後悔」呢個題目，因為父母早年離婚後，自己十分怪責爸爸，但某日回家見姐姐痛哭，先知道爸爸離世。顏志恆最心痛係爸爸在世時冇陪過佢，而且兩父子一張合照都冇。已成人父嘅顏志恆而家更體會到爸爸當日被兒子忽視嘅傷痛，更令佢感到遺憾。顏志恆以《空凳》表達呢份情感，但評判評價兩極，Eric Kwok認為志恆副歌唱得太用力，似係對爸爸咆哮；張佳添覺得顏志恆鋪排上出錯，太早發力，令後段難以再昇華。結果顏志恆得到81分﹐出線在望，但最開心嘅可能係節目組安排顏志恆太太同2個囝囝到場支持。

喺之前演出存在感唔高嘅羅啟豪，原來有個歌唱家媽媽劉英。劉英15歲就參加業餘歌唱大賽贏得冠軍，後來成為酒店駐唱歌手，但為咗組織家庭放棄音樂。到3個小朋友長大後，劉英「重出江湖」同朋友組成歌唱團，早前更為陳奕迅《盲婚啞嫁》MV獻唱。被稱為「英國豪」嘅羅啟豪選唱英文歌Never Enough，雖然得到80分，但被Eric Kwok批評「feel唔到個故事」，而且律動唔夠。

以「伴侶」為人生題目嘅周吉佩（吉吉），感謝當初太太力撐佢，但原來周太本身唔同意老公參加《中年好聲音》，吉吉更加係先斬後奏，搞到婚姻有危機！後來吉吉向太太吐心聲，話已經成為丈夫同爸爸會更有承擔。而吉吉唱《留給這世上我最愛的人》亦獲得評審一致好評，當年為周吉佩做過歌曲監製嘅Eric Kwok，更加認為係認識多年以來最好嘅演出。結果吉吉得到上半場最高分嘅82分晉身十強。

最後出場係「顏值擔當」支譽儀(Venus)，事業家庭都得意，但係成長階段媽媽管教好嚴，Venus又聽唔入耳，到近年自己成為先了解。不過Venus媽媽近年身體有小毛病，佢希望可以肩負起照顧責任。而Venus選唱高難度嘅If I Ain’t Got You，伍仲衡認為冇上次唱Mercy咁有groove，Eric Kwok就覺得情感上同Venus原本想向媽媽致謝嘅方向唔同。但係最終支譽儀得到82分，將梁浩銓淘汰出局。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！