《九五至尊》當年今日：江華/張可頤/吳美珩/鄧浩光/譚小環/郭峰嘅現況係點？

2003年嘅神劇《九五至尊》喺無綫深夜時段播出，故事講述因為一個水龍捲，令到雍正皇帝（江華飾）及呂四娘（張可頤飾）由清朝穿越到21世紀嘅香港。兩位古代人嚟到現代要重新適應生活，雍正更要由高高在上嘅皇帝變成「打工仔」李大蝦，當中鬧出唔少笑話。當年大結局收視高達46點，叫好又叫座，今次重播都令到一眾劇迷晚晚捱眼瞓追睇。《九五至尊》呢套已經17年前嘅劇集，呢班主要演員而家嘅現況又點呢？

江華

江華飾演雍正皇帝及喺現代人李大蝦，有出眾嘅演技，當年江華好多戲都好受歡迎，不過佢喺2004年離開無綫，選擇北上發展。江華喺2015年更轉行做保險，但第二年就無做。江華現時淡出娛樂圈，上年鮮有喺慈善節目同老婆麥潔文合唱。

張可頤

張可頤喺1994年參選港姐，雖然落選不過亦成功入行，張可頤喺無綫拍攝咗多部膾炙人口嘅經典劇集，例如《難兄難弟》、《九五至尊》、《茶是故鄉濃》及《金枝慾孽》等等，更憑《九五至尊》飾演呂四娘一角，升呢成為視后。之後，張可頤喺2005年與無綫改簽部頭合約，並去內地拍劇，但因拍攝《長恨歌》而患上抑鬱症，又導致甲狀腺分泌失調，因此停工兩年醫病。今年51歲嘅張可頤，同商界女強人Laura合作成立經理人公司「涵耀星際」，做埋公司行政總裁。

吳美珩

吳美珩係1996年國際華裔小姐亞軍，因外表清秀同仙氣十足，而有吳美人稱號。吳美珩喺劇中飾演公司高層兼千金小姐Rachel，同飾演李大蝦嘅江華有唔少感情戲。吳美珩多年來都有唔少經典劇集角色，例如《妙手仁心III》Sarah、《女人唔易做》高ling及《情牽百子櫃》姜心悅等等。至於吳美珩嘅感情生活，佢一向都非常低調，一直隱瞞與百億富豪拍拖同結婚，直到有BB先決定離開娛樂圈，專注家庭。吳美珩向來都冇分享自己生活，只係之前同圈中好友食飯嘅合照，先發現吳美珩同以前冇咩分別，一樣都係咁靚咁有仙氣。

鄧浩光

鄧浩光出身於游泳世家，退役泳壇後加入娛樂圈，佢都參與過唔少劇集拍攝，不過都係飾演配角居多，例如《皇家警察實錄》、《流金歲月》、《戀愛自由式》及《學警雄心》等等。鄧浩光喺《九五至尊》就飾演岑家二公子Hugo，係一位同性戀者，角色好有發揮。據知，鄧浩光喺02年結婚及05年囡囡出世，為咗多啲時間陪屋企人，於是選擇離開幕前，轉行做藥廠擔任銷售及市場部主管，而家都有間唔中出席公司嘅公開活動。

譚小環

譚小環喺劇中飾演Tina，譚小環喺1994年獲得港姐冠軍後加入娛樂圈。入行後即被無綫力捧，為唔少大型節目擔任司儀及參與唔少劇集拍攝，例如《僵屍福星》及《緝私群英》。另外，譚小環亦有發展歌唱及電影事業。曾一度離巢嘅佢，喺2002年重返無綫，當時佢都係主要拍劇，例如《皆大歡喜》、《洗冤錄II》、《妙手仁心III》、《東方之珠》及《碧血鹽梟》等等。之後，譚小環喺2012年宣布息影，同老公蔡強榮（Eric）喺2014年開首間小食店，由一位港姐冠軍轉行賣魚蛋。

郭峰

郭峰係圈中著名老戲骨，喺《九五至尊》中就飾演郭帶旺，係吳美珩及鄧浩光等人嘅舅父。郭峰係參加第一期藝員訓練班後入行，之後參與過無數劇集。例如《浪子》、《十大刺客》、《萬水千山總是情》、《創世記》及《尋秦記》等等。直到2012年，郭峰同無綫約滿後轉投香港電視，2016年再度返無綫拍劇。