內地奀星爆TVB中年演員集體失業 拎廖啟智做小販劇照當例子

拍過《知否知否應是綠肥紅瘦》嘅內地女演員馬丁，喺小紅書拍片爆料，表示最近同一位5年前一齊拍戲嘅TVB朋友聚會，對方話已經轉行做品牌銷售，馬丁仲喺短片提到「年前開始呢，TVB一批中年的演員集體失業……看到這幅景象，說不痛心也是假的」。

馬丁仲舉咗一堆例子，話有人「擺地攤、賣保險」，但係配合嘅畫面，係已故演員廖啟智遺作之一《女人街，再見了》嘅外景側拍，而戲中智叔飾演女人街賣衫檔小販，同一張相多次被用作謠傳智叔做小販。

馬丁又話「有的人說沒戲拍了，一年沒有收入了，靠賣菜維生，經常會有些顧客來要求合影」，但就冇指名道姓係邊個，根本無從稽考。最後馬丁不無感歎「人生高低起伏，巔峰不迷戀，低谷不自憐」。

當然片中有部份所講嘅都真有其事，例如馬丁話有人做巴士司機，講嘅應該係「亞視霆鋒」伍偉樂。至於提到「去工地搬運的」，應該係前年被拍到「炒散」做搬運工人嘅莫家淦同陳國峰。

的確近年唔少藝人都因為疫情影響，演出機會大減，於是放下身段打工搵食。拍過電影《20．30．40》嘅楊淇，前年為生計去咗一間大學做保安，佢反而視之為難得嘅生活經驗。早前喺深圳被斬嘅前亞視藝人黃竣鋒，都係去咗餐廳打工養家。

而TVB都有唔少藝人因為合約條件等原因，決定唔再留低。效力TVB 23年的溫裕紅，因為新合約之下人工只有之前一半而決定離巢，閒時打理植物為樂，生活極為低調。曾患乳癌嘅溫裕紅早前同林建明等人聚會時戴上頭巾兼變得消瘦。喺《愛．回家之開心速遞》扮演「威龍潘金蓮」嘅梁茵早兩年離巢，早排被拍到轉行做日本餐廳侍應。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！