受訪大爆無綫拍劇辛酸 蘇玉華：有一半時間都係拍緊垃圾

蘇玉華（阿蘇）喺本月5日應邀到香港電台節目《瘋Show快活人》做專訪，平日大家見到阿蘇喺娛樂圈中好受人敬仰尊重，覺得佢喺無綫已經係一姐地位。今次阿蘇上電台接受主持曾志豪、貴花田及王耀祖嘅訪問，大談自己由出道以嚟嘅演藝之路，談何容易，當中更分享自己從痛苦中能夠感到快樂嘅一條出路，更講出自己同男友潘燦良嘅感情生活。

阿蘇話已經入行27年，1989年用舞台劇演員身份出道，成為5年嘅舞台劇演員後，1994年正式加入無綫電視成為合約藝人。2016年拍完《平安谷之詭谷傳說》就暫別電視圈，再向舞台劇發展到現時。大家都一致認為係開心果嘅阿蘇，大多數時間都係笑面迎人，性格樂觀，但節目中阿蘇表示其實知道「有苦自己知」，好多辛酸時大家未必咁清楚。

初入行時，阿蘇一直都係擔任「Yes Man」，經常只有「Say Yes」唔會「Say No」，結果就試過同一時間接拍三套電視劇集。有一日阿蘇休息嘅時候，有位PA派通告俾佢，佢望住疊通告覺得自己嚟緊嘅日子冇足夠時間休息，過著糜爛嘅生活，唔明自己究竟做緊乜，反問自己為乜要咁辛苦嘅時候，真係即場喊出嚟。

佢覺得自己接通告太廣泛，真係壓力爆煲，所以阿蘇由合約藝人改簽部頭合約，工作減輕咗，人亦都舒服咗，咁就可以專注演戲。除咗生理上曾經受到折磨外，阿蘇最在意就係自己一直嘅付出及成果唔能夠成一個對比，就算自己有幾努力付出，放哂所有時間及精力拍劇，都覺得一半時間係拍緊垃圾。佢見到其他藝人同事都係同樣努力，但唔係每個作品都有質素，就覺得無論大家幾努力，都係浪費咗付出。

要捱嘅終於捱完，阿蘇現時終於可以過返一個安穩舒服生活，做自己鍾意嘅工作。感情上，亦有男朋友潘燦良一直陪伴，兩人甜蜜幸福，共同朝向舞台劇方面發展，就算大家性格一凸一凹，都有共同話題。