【台北酒店】唔過$600 新開平價酒店大比拼!
台北係香港人第二故鄉,耐唔耐就算得一個Weekend都想過去玩下食下。台北酒店都開得好快,不過大家都留意高級酒店,似乎無咩人注意到今年台北都開咗好幾間經濟實惠嘅酒店,最啱香港人,玩到夜一夜先返酒店,只求乾乾淨淨有間房瞓就夠。以下3大經濟酒店,地區、特色各異,大家可自行選擇。
平價名牌:IBIS
講起經濟酒店品牌,IBIS一定榜上有名,呢間全球幾乎都有分店嘅連鎖酒店集團,預計10月正式進駐台北,仲喺地點優越嘅市中心!位於建國北路二段,前身為RF比提商旅,IBIS接手後重新裝潢設計,全酒店共有42間客房,2至3種房型,有出名好食又抵嘅早餐提供。不過酒店預計要9、10月先正式開業,大家可以密切留意官網,隨時有平房訂!
舒適度:***½ (以5星為滿分)
IBIS酒店一向係賣平價賣乾淨,舒適就唔見得會比5星級酒店咁正,但作為新酒店都應該唔使太擔心。
設施:***
有Common Area畀大家自由活動,就算房間細啲都唔怕,另外有好出名嘅IBIS早餐,加分。
抵玩度:未能評分
未正式推出有關房價,請密切留意。
台北IBIS
地址:台北市建國北路二段93號
台灣本土名牌:Just Sleep
台灣一大酒店名牌就係Just Sleep捷絲旅,大家最熟悉應該都係西門町分店,原來台灣第8分店已經喺6月於三重館旁開咗!Just Sleep呢間分店係走工業風,酒店共有95間客房,最最最大賣點係酒店新開業優惠至10月31日,一間普通房連早餐計埋都唔使$600港紙!
舒適度:****
Just Sleep一向係信心保證,新酒店採用工業風,而且酒店房一啲都似平時經濟酒店咁細小。
設施:****
雖然無泳池等高級設施,不過都有基本餐廳、健身房等,都叫新淨舒服。
抵玩度:*****
新開幕優惠$600唔使,已包2人早餐,去到10月31日咋,快手訂!
Just Sleep台北三重館
地址:新北市三重區三和路四段107-1號
預訂:按這裡
台北車站新店:城市商旅
另一個台灣本土品牌就係城市商旅,今次進軍去到台北車站,超方便位置,行10分鐘就去到寧夏夜市,去年12月先落成。交通方便,四通八達係最大賣點,而且城市商旅一向走中高端路線,但呢間台北車站分店就走便宜路線,平日一晚都係$400幾蚊,以台北車站嘅酒店嚟計,真係抵到笑!
舒適度:****
城市商旅走精品酒店格局,型格得嚟又有氣氛,而且開業不足一年,夠晒新淨!
設施:***
由於走商務風格,酒店無任何特別設施,扣少少分。
抵玩度:*****
開業一年唔夠,台北車站酒店,竟然唔使$400一晚,真係頂爛市。
城市商旅 北門館
地址:台北市大同區延平北路一段51號
預訂:按這裡
【立即讚好】全新 Yahoo 旅遊 Facebook 專頁
Yahoo 旅遊以全新樣貌登場,Facebook 專頁當然同時煥然一新!立即讚好,每日睇盡旅遊新資訊!