台灣男團五堅情訪港 人氣直逼MIRROR逼爆商場 狼人殺男神逐個睇！

由邱鋒澤、黃偉晉、賴晏駒、陳零九及婁峻碩組成嘅台灣組合「五堅情」（W0LFS）喺台灣爆紅，佢哋早前喺台北小巨蛋舉辦演唱會，門票一開賣即被秒殺完售。另外，五堅情將於三月喺香港舉行演唱會，而佢哋近日亦嚟到香港宣傳，喺今日舉行商場簽唱會，而簽名證被炒升近6倍至$2,800元一張，認真誇張！

邱鋒澤
現年34歲嘅邱鋒澤喺新加坡出世，擁有富二代身份嘅佢冇繼承家族白咖啡企業，反而喺父母支持下隻身去到台灣，發展其音樂事業。邱鋒澤喺2014年發行首張個人創作專輯，專輯歌曲創作由佢自己一手包辦，之後憑著佢嘅毅力和才華，喺台灣演藝圈闖一片天。佢嘅演藝事業並非一帆風順，曾經參與電視劇拍攝，不過就未有爆紅，直至2019年喺《娛樂百分百》嘅單元「凹鳴狼人殺」令佢知名度大增。佢除咗擁有可愛嘅天然呆性格之外，亦同時有好多奇怪嘅高招，深得觀眾喜愛。同年，邱鋒澤與狼人殺玩家陳零九合作，推出創作歌曲《天黑請閉眼》，結果大受歡迎，更被網民指佢係「被狼人殺耽誤的創作歌手。」之後，二人再與狼人殺玩家賴晏駒、婁峻碩及黃偉晉組成「五堅情」。去到今年，邱鋒澤與MIRROR成員呂爵安（Edan）隔空合作出歌《一表人才》，及國語版《年青有為》，令兩地粉絲都非常驚喜！

陳零九
現年35歲嘅陳零九，2009年成為網絡歌手，先後推出兩張專輯，之後再喺2013年簽約唱片公司，2014年舉行首次個人演唱會，推出多首膾炙人口嘅歌曲，人氣相當不俗。陳零九除咗歌唱事業之外，喺2019年開始佢亦有參與綜藝節目嘅主持工作，例如《娛樂百分百》及《Carry吧 玩家們》等等，佢喺《娛樂百分百》中單元《凹嗚狼人殺》有出色嘅表現，成為MVP次數最多的玩家，知名度激增。瓣數多多嘅陳零九，除咗演藝事業之外，佢嘅副業涉獵創建公司、服裝品牌、YouTube頻道、及餐廳等等。

黃偉晉
32歲嘅黃偉晉喺2009年參加第六屆《超級星光大道》，並以第八名成績畢業。佢喺2012至2019年期間擔任團體SpeXial嘅主唱，及喺電視劇《終極一班》系列中飾演止戈一角而為人熟悉。黃偉晉喺2018年9月至2019年8月入伍當兵，退伍後便與唱片公司完約，而佢亦正式退出SpeXial，之後佢亦開始專注《娛樂百分百》主持工作，同樣係單元《凹嗚狼人殺》表現亮眼，成為MVP次數第三多嘅玩家。另外，冇偶包嘅佢經常笑料百出，被粉絲笑封係大嬸系玩家 ，深得觀眾歡心。

賴晏駒
31歲嘅賴晏駒喺出道前參加過多個舞蹈比賽，2013年以《超級接班人》第三名姿態出道。多年嚟，賴晏駒參與多個綜藝節目拍攝，例如《完全娛樂》、《綜口味娛樂》、《娛樂百分百》及《食尚玩家》，當中憑《娛樂百分百》單元《凹嗚狼人殺》中嘅機智及幽默表現，深得觀眾愛戴，而佢亦係MVP次數第二多嘅玩家。另外，佢亦有嘗試歌唱事業，推出歌曲《下次我會把你抓緊》、《娘娘槍》及《摔壞最後的奢望》等等，都有不俗嘅迴響。

婁峻碩
現年29歲嘅婁峻碩擁有阿美族血統，佢喺2014年簽約唱片公司，翌年憑參加《Super Star 我要當歌手2》，並喺2017年推出單曲《你老爸在你背後》正式出道。身為饒舌歌手嘅佢喺2018年開始參與《娛樂百分百》單元《凹嗚狼人殺》，當中憑一句帥氣霸嗆「查個毛」，人氣急升兼榮登金句王寶座。佢除咗係饒舌團體CHING G SQUAD成員之外，仲係加入節目成員男團，令「四堅情」進化成為「五堅情」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！