【台語世界／錄音】物理ê世界

物理ê世界表面看--來是真複雜無仝 ê 現象， 包含各種無仝 ê元素（element)， 物質（matter），星體，能量（energy)，甚至時間......不過近代400 冬科學 ê 研究證明，伊是一个真規則 ê 世界，攏總遵守幾條基本簡單ê規則。你若是物理學家，甚至ē-tàng kā 所有ê現象，ùi上小 ê Q子（qoark）到上大ê宇宙，ùi咱所知上早ê時間 （宇宙出世）到上尾ê時間（宇宙結束)，用一條tn̂g-tn̂g ê 數學公式表現出--來......Che 敢m̄是一个奇蹟？

物理ê世界iáu有一个你想bē到ê奇蹟。自然ê現實（reality）kap咱日常感官ê經驗其實無一定一致，甚至對反。親像時間受加速ē變慢，親像光（ light ）同時是波動（ wave）也是質粒 （ particle），一粒光子（photon ）同時存在tī 無仝 ê所在（localization）......種種奇巧ê量子力學（qoantam mechanic）ê世界， 你無法度想像。不過請你ē記--得，che m̄是自然界ê魔術，che是物理基本ê現實。 經過科學ê目睭chiah有法度經驗，瞭解 ê 現實。

你ē進一步問，chia ê基本規則是按怎來--ê？Che咱 chín無答案，或者是完全靠機會（random chance），或者是人類知識範圍以外，永遠 bē-tàng 回答 ê 問題。總--是物理 ê世界允准咱看lú chē，親像一个thǹg半光ê美女，lú hō͘咱愛 beh看 lú chē，感覺神密，敬畏， 美麗，提昇咱ê心靈，甚至崇拜ê宗教感。

台灣字（白話字）版
Bu̍t-lí ê sè-kài piáu-bīn khoaⁿ--lai sī chin hok-cha̍p bô-kâng ê hiān-siōng， pau-hâm kok-chióng bô-kâng ê goân-sò͘ （element， bu̍t-chit（matter）， chhiⁿ-thé， lêng-liōng ( energy)， sīm-chì sî-kan......put-kò kīn-tāi sì-pah tang kho-ha̍k ê gián-kiù chèng-bêng， i sī chi̍t-ê chin kui-chek ê sè-kài， lóng-chóng chun-siú kúi-tiâu ki-pún kan-tan ê kui-chek。 Lí nā-sī bu̍t-lí ha̍k-ka， sīm-chì ē-tàng kā só͘-ū ê hiān-siōng， ùi siōng-sió ê Q-chú（qoark）kàu siōng-tōa ê ú-tiū， ùi lán só͘-chai siōng-chá ê sî-kan（ú-tiū chhut-sì）kàu siōng-bóe ê sî-kan（ú-tiū kiat-sok）， iōng chit-tiâu tn̂g-tn̂g ê sò͘-ha̍k kong-sek piáu-hiān chhut--lâi......Che kám m̄-sī chi̍t-ê kî-chek？
Bu̍t-lí ê sè-kài iáu-ū chi̍t-ê lí siūⁿ-bē-kàu ê kî-chek。 Chū-jiân ê hiān-si̍t（reality）kap lán ji̍t-siông kám-koan ê keng-giām kî-si̍t bô it-tēng it-tì， sīm-chì tùi-hoán， chhin-chhiūⁿ sî-kan siū ka-sok ê éng-hióng ē piàn-bān， chhin-chhiūⁿ kng（light）tông-sî sī pho-tōng（wave）iā-sī chit-lia̍p（particle）。 chi̍t-lia̍p kong-chú tông-sî chûn-chāi tī bô-kâng ê só͘-chāi（localization）......chióng-chióng kî-khá ê liōng-chú le̍k-ha̍k（qoantam mechanic）ê sè-kài， lí bô-hoat-tō͘ sióng-siōng。 Put-kò chhiáⁿ-lí ē kì--tit， che m̄-sī chū-jiân-kài ê mô͘-su̍t， che sī bu̍t-lí ki-pún ê hiān-si̍t， keng-kòe kho-ha̍k ê ba̍k-chiu chiah ū hoat-tō͘ keng-giām， liáu-kái ê hiān-si̍t。
Lí ē chìn-chi̍t-pō͘ mn̄g， chia-ê ki-pún kui-chek sī án-chóaⁿ lâi--ê？Che lán chín bô tap-àn， he̍k-chiá sī oân-choân khò ki-hōe（random chance）， he̍k-chiá sī jîn-lūi tì-sek hoān-ûi í-gōa， éng-oán bē-tàng hôe-tap ê būn-tê。 Chóng--sī bu̍t-lí ê sè-kài ún-chún lán khòaⁿ lú-chē， chhin-chhiūⁿ chi̍t-ê thǹg pòaⁿ-kng ê bí-lú， lú hō͘ lán ài-beh khòaⁿ lú-chē， kám-kak sîn-bi̍t， kèng-ùi， bí-lē， thê-seng lán ê sim-lêng， sīm-chì chông-pài ê chong-kàu kám。
（Chok-chiá chù：chhiáⁿ-iōng pe̍h-ōe-jī）（作者注：請用白話字）

讀hōo你聽：

文章屬作者個人意見，文責歸屬作者，本報提供意見交流平台，不代表本報立場。