叱咤2022︱MC張天賦助理暗指被洪嘉豪𠝹票惹網民不滿 已非第一次攻擊洪嘉豪？

《2022年度叱咤樂壇流行榜頒獎典禮》第二階段投票將於本周五（25日）截止，透過樂迷神聖一票從10強中選出我最喜愛的男、女歌手及組合最後5強。其中，入圍10強男歌手包括張敬軒、林家謙、MC張天賦、洪嘉豪、MIRROR成員Anson Kong江𤒹生、Edan呂爵安、姜濤、Jer柳應廷、Ian陳卓賢及Anson Lo盧瀚霆；而MC早前於記者會就直認自己想攞男歌手獎，而且目標係金獎，但覺得自己仲算係一個新人，所以要時間成長下，慢慢嚟。不過，日前有網民就將MC Fans Club（MCFC）拉票電郵內容及MC助理兼Telegram粉絲群組管理員Yee Yee發言流出。

MCFC呼籲大家今年「All in MC」，否則就等睇華納全軍覆沒：「今年有票源重複，只會被不斷𠝹票。要贏鏡仔，每個賦二代都要更加出多啲力拉返多啲票返嚟！今年唔係講笑，唔All in MC就等睇華納全軍覆沒。五鏡入五強嗰陣就真係多謝我哋喇。」10強男歌手名單中，MIRROR成員就佔6席位，有網民分享MC助理Yee Yee發言，Yee Yee表示其實MC今年對手除咗係MIRROR，仲被「自己兄弟𠝹票」，結果就係兩個輸晒一齊入唔到5強：「今年明明有機會，點知仲要畀自己人𠝹票，無得靠公司，佢只可以靠自己。」矛頭直指同屬華納嘅洪嘉豪。Yee Yee言論惹網民討論，大部分網民不滿其態度，指因為Yee Yee咁講嘢而會投比洪嘉豪，又多謝佢幫洪嘉豪拉票。

而其實Yee Yee並非首次講錯嘢；早於9月份，佢就曾發表針對洪嘉豪及其粉絲言論，包括斥責洪嘉豪粉絲於MC及洪嘉豪聯乘演唱會派螢光棒阻住睇騷視線兼製造垃圾、大踩洪嘉豪啲歌太悶，又強調MC加入華納一事與洪嘉豪無關，令洪嘉豪粉絲相當不滿，甚至指好有興趣睇MC喺勇武Yee Yee帶領下可以行到去邊。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！