媽咪未送嫁留憾 黃芷晴飲泣

飽受喪妻之痛的黃日華，昨日偕女兒黃芷晴到殯儀館為愛妻安排後事，經過三個半小時商議，決定於6月13日舉行喪禮。黃日華受訪時透露，亡妻遺憾未能見證女兒出嫁，芷晴聞言低頭飲泣。

黃日華太太梁潔華日前病逝，終年59歲，昨日下午1時許，黃日華偕女兒芷晴等一行四人前往紅磡世界殯儀館。戴上眼鏡及口罩的他眼腫腫，但精神尚可，相反芷晴心情沉重，全程低頭，受訪時表示未有夢見媽咪，但在家看見有飛蛾停留，似陪伴他們。對於發文想媽咪回來做其女兒，芷晴說：「係呀！因為爸爸話媽咪一生辛苦照顧我，為咗我放棄事業，所以希望體會佢嘅角色。」並表示已為媽咪揀好遺照。

未睇遺囑

至於黃日華自言心情OK：「因為唔係突然發生，有幾年時間畀我哋慢慢適應，個女都知道呢一日始終來臨。（覺得太太好叻？）係呀！事業、家庭、動物都照顧好，做人都好堅強，永不放棄，從來冇向困難屈服。呢幾年佢辛苦，大家都心痛，但佢冇放棄過，堅持到底，想打贏呢場仗。（太太最後嘅時候好辛苦？）冇，最痛已經過咗，係笑住走。（有冇交低點處理身後事？）佢立咗遺囑，有叫我幾時拎出嚟睇，但暫時未有時間。」問到太太可有遺憾，在旁的芷晴忍不住飲泣，黃日華說：「始終都係擔心個女未嫁人，同埋擔心佢阿媽，我叫佢放心，芷晴大個女，識照顧我，唔使我照顧佢。」

6.13設靈

離開殯儀館時，黃日華透露定於6月13日設靈，翌日出殯，禮堂布置以清簡為主，壽衣選用太太喜愛的服飾，儀式過後遺體將火化，但未決定骨灰擺放位置。

此外，梁潔華生前向粵劇名伶文千歲拜師學藝，對於愛徒離世，文千歲感到無比悲痛，大讚對方溫柔賢淑兼熱愛家庭；師妹千珊則難忘梁潔華對她的指點，以及演出時幫忙化妝。