【專文】由不答不七的Chinese Taipei講起

台灣人的野球隊在這擺世界12強賽拚著冠軍，予台灣人攏足歡喜閣感覺足驕傲，總是嘛閣較嚴重暴露Chinese Taipei這種不答不七的隊名問題，尤其，這寡隊員幾乎攏無人自認是中國人，怹是所有參賽隊伍中間，唯一制服胸前無繡家己國名的隊伍。

11月26日，賴清德在接見這群予咱台灣人在國際社會足光榮的野球隊員之時，蕭美琴對台灣隊名問題嘛表示無奈和心酸；賴清德雖然名義上是外來非法的假中華民國總統，伊應該知影，伊若有徛在台灣民族的利益發言，事實上國際社會會承認伊有替台灣民族發言的身份。

賴清德應該有徛在高山的高度和氣魄，趁這個機會向台灣社會和國際社會指出，問題出在台灣人予外來掠奪集團所建構的假中華民國體制所綁架，台灣人予彼種外來體制錯誤地綁做中國人，閣將台灣錯誤地綁做中國領土的一部分。

因為，國際社會咁哪承認中華人民共和國才是中國的合法代表，致到咱台灣隊祙當繡無予人認定的國名在胸前，講予白著是，人認為藍營權貴竊占咱台灣所建構的中華民國體制下，所成立的政府並祙當代表任何一個合法的國家。

賴清德會當閣進一步講予台灣社會理解，這個外來的假中華民國體制，予中共會當主張「統一」是中國的內政問題，變做予怹有合法閣正當的藉口侵犯台灣，其他國家無有正當理由干涉，所以，咱台灣若繼續維持假中華民國體制，著是在替中共維護怹未來併吞台灣的合法性和正當性，遮是台灣人一定著警覺，著知影嘿是會導咱台灣民族行向滅亡的死路！

到底在今仔日民族認同分歧，造成台灣社會嚴重混亂的情形下，台灣人要安怎行倒轉來活路，遮應該是所有務實的台灣民族主義者著用心思考的問題。

在世界民族解放運動中間，有幾若個民族過去嘛經歷像咱台灣人自戰後仝款的苦難境遇，怹傳統的生活領域，嘛被外來掠奪勢力建構的壓迫體制所控制，甚至併吞去，總是，在家己民族領域內，原本或後來經過民主運動的鬥爭，在政治上有發展出某種直接或間接的民主制度。

在這種政治環境下的民族，雖然是活在外來統治體制的壓迫下，猶原對出自個人自由意志選擇的授權，會有較選擇性認真的尊重和支持，其中，北美殖民地、愛爾蘭和波羅地海三國的民族獨立運動，攏是由人民授權產生的民族議會，帶領推動來完成民族獨立的目標。

台灣社會支持獨立的人佔絕大多數，堅持呣認同台灣的外來赤藍人是少數，親中共的更加是極少數，何況怹早著「失根」，無母國通支援怹像過去施行白色恐怖，暴力鎮壓台灣人的反抗，遮嘛是怹自90年代開始勾結中共的主要原因，要借中共的聲勢來壓台灣人，遮顯然對一寡無知愚戇的台灣人，有產生相當的嚇阻效果，致到赤藍勢力會當繼續在台灣社會擁有無成比例的影響力，阻礙轉型正義，阻擋台灣正常化。

總是，中共建國初期殘殺數百萬的國民黨人，無影今仔日的深藍陣營攏會「相信習近平」，中共嘛無可能相信深藍陣營會戇戇「相信習近平」。

既然中共目前完全無夠軍武實力，通對台灣做有意義的軍事侵犯行動，台灣人應該保握機會，推選議員組成「台灣民族議會」來領導民族獨立運動，仿推動美國獨立的「大陸議會」處理堅持效忠英皇的移民的做法，沒收親中派的財產並將怹驅逐出境，徹底瓦解親中共勢力，凝聚台灣社會的民族認同。

「台灣民族議會」的決議在國際社會是有合法性閣有正當性，會當仿北美殖民地、愛爾蘭和波羅地海三國直接否決外來憲法和其他法律的合法性，議決宣布廢除外來中華民國憲法，並剝奪拒絕認同台灣獨立的人的公民權，安呢，立法院的亂象會當隨時解除，台灣會當即時進行「正名制憲、公投獨立」，當然著無閣有Chinese Taipei這種不答不七的隊名問題。

專文屬作者意見，文責歸屬作者，不代表本報立場。