台灣人過去的語言學習經驗定定是用咱的母語去換別人的語言。這是減少式的雙語現象。語言復振就是共失去的母語抾倒轉，毋過，弱勢語言的復興，拄著真大的挑戰。因為人少，弱勢族群較捷拄著單向的語言學習，影響著弱勢語言的生存。著是講，弱勢族群愛學強勢族群的語言，毋過，強勢族群無學弱勢語言，弱勢族群愛負擔較濟的語言學習佮使用成本，閣考慮別人可能聽無，尾仔規氣改換強勢語言。這是語言無平等的代誌。

咱進行臺灣語言復振運動的時陣，追求的是多元語言永續發展，毋是單一語言的復興。佇遮咱提出會當促進整體臺灣語言復興的方案是：透過語言互相相?的觀念，建議逐家發揮多語言美德，佇社區互相學互相的語言，按呢社區的弱勢語言，較有學習佮使用的機會。這是語言平等，促進多元語言永續發展的好辦法。

檢采有人會講這傷困難，咱無法度學遐濟的語言。其實，咱臺灣自早就是一?語言真多樣的所在。你若看過SEQALU（斯卡羅）這齣戲，你會看著五、六種語言咧使用，真正是多語的花園。因為日本佮國民黨的單語同化政策，致使咱叫是干焦一種語言才是正常，顛倒對咱本底就有的語言多樣性感覺生份。咱需要恢復臺灣的多語言美德，著是講，咱臺灣語言復振毋但愛揣轉來咱的母語，仝款重要的是恢復咱互相學習厝邊隔壁的語言，培養多語言能力，毋是西瓜倚大爿，造成單一語言獨大。

咱學華語、失去母語的過程，其實嘛失去多語言的能力。臺灣人其實攏是多語言人才，特別是人口較少的族群。舉幾?仔例，咱看花蓮玉里遐的客人會曉阿美族語，阿美族會曉客語；苗栗南庄是賽夏族的人會曉講客語，客人會曉講賽夏族語。這個雙語互通的多語言花園，拍破愛有單一語言，無仝族群才有才調溝通的神話。原住民族佮客家彼此互相學習語言，共同創造族語分享空間，實踐語言平等，起造社區語言會當歇喘的所在。

這款雙向的語言學習佮使用對臺灣語言的復興有重要的啟示。咱若欲維護臺灣多種語言的美麗花園，就需要脫離大隻魚仔食細隻魚仔的世界，用生態的角度來管理語言花園內底大大細細的花欉，提供生湠的空間。咱的語言花園管理的辦法是保護稀有的花欉、增加瀕臨絕種的花欉（弱勢語言）及控制生湠傷緊的花欉（強勢語言）。按呢著會當共「金字塔」踅顛倒反，予弱勢語言通好有較濟的保護，才袂造成強者愈強、弱者愈弱的惡性循環。這款多語言美德才有法度挽救弱勢語言，實踐社會正義，互臺灣的多語言花園永續發展。

咱的語言復振除了「家己的母語、家己救」以外，嘛愛透過族群之間互相學習佮使用彼此的語言，來維持弱勢母語，同時保持語言多樣性。為著挽救弱勢語言，咱的確著愛想像而且起造多語言學習佮使用的空間，予多種語言會當做伙平等佇美麗的語言花園生湠發展。

咱逐家著互相相疼，培養多語言的美德，骨力維持家己佮咱厝邊隔壁的語言，重建語言多樣的美麗花園。 （作者為台東大學華語文學系教授、台灣教授協會會員）