新手爸爸伍家謙湊唔掂龍鳳胎？舊同事鄭萃雯幫手「兼職陪月」

前無綫新聞部體育組記者伍家謙，喺今年4月時榮升爸爸，曾任職空姐嘅太太幫佢生咗對龍鳳胎「思行」同「思齊」。新手爸爸伍家謙仲經常喺社交網站上載湊仔生活，由於一次過要湊兩個真係一啲都唔簡單，就算有陪月幫手都一樣搞唔掂，所以佢間中都會搵朋友幫手，好似香港拳王「神奇小子」曹星如，當時伍家謙大讚「新陪月今日返工喇，手勢幾好，做嘢又有交帶。」

最新又請嚟另一個「兼職陪月」，佢就係前主播鄭萃雯。鄭萃雯本身都生咗對孖仔，所以有足夠經驗湊兩個，伍家謙上載相片更留言話：「姐姐要返九龍喇！我哋全家上下都好唔捨得佢。佢話因為要照顧自己對BB所以唔續約喎！誠意推介呢個本地完約姐姐，豐富湊孖B經驗，流利廣東話，識煮中餐，做嘢爽手兼老實，從未試過用我地址借錢，放假可放Weekday，保證做完合約先走。認真番，多謝@karen_n_twins姐姐嚟探佢哋，仲幫手餵咗餐添。（下次如果可以餵多幾餐就更好嘞）」。

而鄭萃雯又喺自己社交網站搞笑發文話：「應徵家庭傭工自我介紹」，「具豐富湊孖B經驗，操流利廣東話，笑容可掬，懂煮中餐，可放weekday。名人前僱主 伍家謙 誠意推介」。之後，伍家謙亦有留言回覆：「上嚟睇得嗰一陣我覺得你過唔足癮。下次不如試下玩通頂吖，仲好玩～」