日媒調查：5種男人絕對不能嫁 打老婆都係排第二？！

「男怕入錯行，女怕嫁錯郎」，結婚係人生大事，點都要諗清楚先決定嘅。雖然而家好多女仔好驚會變做剩女，所以一到20歲就開始speed dating，想早啲搵到對象嫁咗佢，廢事畀人話係賣剩蔗。但係點心急都好，都無理由唔理好醜，但求就手掛？

日本媒體VenusTap就搵咗500位女性，睇吓邊種佢哋絕對絕對唔會同佢結婚。第1位就係有46.6%人選擇嘅「好女色」，唔係好咸濕中意睇AV嗰種，而係會搵小三出去滾嗰種。梗係啦，有邊個女仔唔想另一半專一，你搵得第2個女人即係唔夠愛我啦？邊個忍得到自己個男人心入面有其他女人⋯⋯

第2位「郁手打女人」都有46.5%人揀，睇啲新聞同劇集都知啦，打得你一次就會有第二次，長期咁落去你只會係咁被佢虐打，仲可能有生命危險，點同你做人世呀？以上兩項最佳人辦咪係崔建邦囉，你應該唔會想嫁佢？

第3-5位分別係欠債（46.3%）、個人衛生惡劣（46.2%）同賭博（41.0%）。3同5位其實都有啲關係，通常賭徒都中意借錢架啦，諗住可以翻身，點知咪又係賭錢落海，甚至一鋪清袋，嫁畀佢分分鐘你要幫佢還埋債。

至於衛生，如果你核突到好似《喜劇之王》入面耳仔有蟲頭髮有曱甴嘅八兩金咁，我諗正常人都接受唔到啦⋯⋯

講到尾咪又係唔好嫁會「嫖賭飲蕩吹」嘅男人，但係點解一定要嫁先？其實自己一個更開心，剩女，又有咩好怕喎？開心咪得囉～