Yahoo奇摩新聞 
林夏薇懶理老公情史︰每個人都有過去
藝人林夏薇去年下嫁身家逾二十億的金融才俊莫贊生(Jason)，婚後經常大晒恩愛，實在令人羨慕羨慕！但原來Jason除了事業成功，連情史都一樣精采！因為佢日前被爆追過多位娛圈女星，其中與前嫩模組合「Donut」成員朱裕琳(Caroline，現改名為朱昱潾) 拍拖三年，出錢捧對方之餘，更在西貢金屋藏嬌！女主人夏薇呢晚就在將軍澳電視城錄影遊戲節目《我愛香港》，睇吓佢點回應先！
現年29歲的夏薇去年七月與45歲的Jason結婚，婚禮在山頂一座超級豪宅低調舉行，男方據知是多家私人公司及上市公司的股東，身家超過二十億；而夏薇則出身自廈門顯赫望族，其伯父林華國(即林峯父親) 更有「廈門首富」之稱，兩人可謂門當戶對！
不過Jason除了婚姻及事業兩得意，從前的感情生活亦相當精采！多年前佢就曾向朋友自誇，追女仔未試過失手，追唔到的只有兩個，就係陳慧琳及鍾嘉欣！而多年前佢曾與嫩模組合「Donut」成員朱裕琳(Caroline，現改名為朱昱潾) 拍拖三年，兩人除了同住在西貢御花園獨立屋，又送Mini Cooper供女友代步；另外女方一直希望做明星，於是Jason亦暗地出錢捧紅女友！
夏薇呢晚錄影遊戲節目《我愛香港》，當然成為傳媒爭相訪問的對象啦！夏薇喺屋企有冇審問老公？佢就只係話︰「每個人都有過去，唔使諗咁多。」夏薇坦言與老公之間沒有秘密，所以兩人睇完報道都係得啖笑。同時又再宣布，因為其飲食王國又再擴充，旗下食肆已經開至第十間！
另外有消息指，夏薇經常攬住愛犬「金珠」其實係老公與Caroline的「定情狗」，佢就未否認地說︰「養狗要有愛心，而且隻狗最黐我。」咁老公係咪真係追過陳慧琳、鍾嘉欣？夏薇就話冇，因為佢向來為人低調，唔鍾意面對鏡頭。
日前有新劇《為食神探》出街的香香，呢晚就自封係「將軍澳小姐」，因為佢從外地回港後，一直都係住在將軍澳區，有唔少街坊都同佢打過招呼！香香就笑說最近嘗試駕車去如觀塘等較遠的地方，但如果過海就一定要搭車。
香香呢晚坦言預咗俾志偉玩，佢最想係玩掟書包遊戲，但到場先知道今晚唔玩，有啲失望！
視帝祥仔呢日代表將軍澳區玩遊戲，佢就大讚志偉主持遊戲節目恰到好處，自己拍咗咁多年戲，都有興趣嘗試主持遊戲節目！
唔講唔覺，原來今年收視三甲的劇集《公公出宮》、《一屋老友記》及《城寨英雄》都係由胡定欣做女主角，對此祥仔都話定欣奪視后呼聲甚高，因為佢走勢好好，而且幾個角色變化都相當大！
