【海綿寶寶出櫃】製作公司喺同志驕傲月出PO 海綿寶寶出櫃引網民激論！

美國卡通片《海綿寶寶》（SpongeBob SquarePants）自從1999年面世之後，一路紅到而家，唔單止小朋友鍾意，好多80及90後嘅大人都好鍾意。除咗因為佢外貌得意、故事有趣之外、佢嘅性向亦非常「引人入勝」。

如果有睇開呢套卡通片嘅朋友，應該知道海綿寶寶同派大星一向非常老友，佢哋深厚嘅感情仲曾經有網友用歌詞「能成為密友總帶着愛」去形容佢哋，可惜一向都冇官方證明佢哋係一對。

不過去到噚晚佢嘅製作公司尼克兒童頻道（Nickelodeon）就喺Twitter發文慶祝 Pride Month （同志驕傲月），並一次過貼出咗海綿寶寶、《降世神通：科拉傳奇》（Avatar: The Legend of Korra）主角科拉，以及於《Henry Danger》飾演角色Schwoz Schwartz嘅Michael D. Cohen嘅相片並留言話：「本月和每月也會與LGBTQ+社群及其盟友一起慶祝同志驕傲」「Celebrating #Pride with the LGBTQ+ community and their allies this month and every month.」。喺相片中，佢哋大家都著住代表LGBT嘅彩虹色調衫，而且Michael D. Cohen本身亦係一名跨性別演員，所以似乎間接承認咗海綿寶寶係同性戀者嘅身份，等同幫佢出櫃，引起網民激論！

其實《海綿寶寶》已故作者美國海洋生物學家史提芬海倫伯格（Stephen Hillenburg）早喺2005 年就表示海綿寶寶的確係 LGBTQ+ 族群，不過佢同 Patrick Star （派大星）並非同性戀者，而係冇性別者。而 Nickelodeon 亦強調呢段發文同卡通片劇情並無關係：「我們只係想令事情變得有趣，同節目無關」。

不過無論如何，呢段帖文已經令到好多粉絲非常興奮，認為佢哋一直堅持嘅諗法，經過多年後終於獲得官方證明！不過同時亦有網民表示將會因為海綿寶寶係同性戀者而阻止孩童睇呢套卡通片。