港台十大金曲投票名單奇景 優秀歌手林家謙被消失 譚詠麟、劉德華等入圍 COLLAR無份爭新人獎

港台今年以慶祝香港廣播95年為由，再次主辦十大中文金曲頒獎禮，仲隆重其事定於5月6日喺紅館舉行。雖然撇甩上年合作嘅TVB之後，唔少唱片公司都答應派歌手支持，但係睇返樂迷有份參與投票嘅幾個獎項角逐名單，都幾出人意表。

喺候選十大中文金曲嘅歌曲名單上，當時得令嘅林家謙一首作品都冇！根據大會準則，曾登上「中文歌曲龍虎榜」三甲位置的歌曲，皆自動成為候選歌曲。而優秀流行歌手大獎準則就係要有「中文歌曲龍虎榜」三甲歌，因此林家謙同時唔入圍優秀流行歌手候選名單。

不過唔止林家謙冇份，近年表現唔錯嘅陳蕾、岑寧兒，盛傳被港台封殺嘅謝安琪、許廷鏗、Serrini、方皓玟一樣被消失。反而資歷深厚嘅譚詠麟、劉德華、郭富城，就會同出道未夠2個月嘅魏浚笙(Jeffrey)一齊爭優秀流行歌手大獎。

另一奇景係舊年出道聲勢強勁、奪得叱咤樂壇生力軍組合金獎嘅COLLAR，居然消失喺「最有前途女新人獎」，另一女團Lolly Talk就順利入圍。再睇返大會準則，「於選舉期內，首次推出其個人主唱華語或粵語歌曲經在香港首次發行的唱片發布；或經唱片公司授權網站供樂迷合法下載；及其歌曲於選舉期內，曾登上「中文歌曲龍虎榜」；並經由唱片公司提名，均自動成為候選新人。」COLLAR舊年有派歌上音樂平台，應該合符條件，未能入圍唯一可能性係公司冇報名。

去年港台同TVB首度合辦《香港金曲頒獎典禮》，取代TVB嘅《勁歌金曲頒獎典禮》及港台《十大中文金曲頒獎典禮》。不過《香港金曲》出街後劣評如潮，MIRROR以排練演唱會為由缺席，而且節目氣氛被狠批老土，甚至影到菊梓喬疑似悶到瞓著，同ViuTV差唔多時間搞嘅Chill Club推介榜年度推介21／22嘅討論度爭得遠。