湯洛雯與馬國明隔空傳情sweet爆 靚湯承認小馬係最可愛

鑽石筍盤馬國明早前被踢爆熱戀「靚湯」湯洛雯，二人隨即上載定情公仔照片到社交網站大方認愛，襯到絕嘅佢哋獲得全城祝福。喺今個月頭，一向不活躍於社交網站嘅馬國明終於開設IG帳戶，之後每隔幾日就會更新。可能馬明同靚湯都忙於拍劇，唔可以成日見面，所以佢哋就透過社交網站隔空傳情。

日前馬國明上載雨後彩虹照片，湯洛雯以「微笑」emoji甜蜜回應。去到噚日凌晨，馬明上載一幅畫有《降魔的》小馬及石敢當嘅圖畫，並留言話：「以前……有好多小朋友同我講……馬明馬明……我爸爸媽媽好鐘意睇你d戲嫁……最近……有好多爸爸媽媽……甚至公公婆婆……同我講……小馬小馬……我d仔仔女女……孫仔孫女……好鐘意睇你嫁……🥰🥰🥰謝謝 降魔的……謝謝小馬呢個角色……令我多咗好多 小朋友fans……謝謝……😘😘😘」

呢個PO吸引大批網民留言話期待劇集第三季之外，女友湯洛雯都有留言。湯洛雯最先喺留言話：「So cute @hubertwu」，飾演石敢當嘅胡鴻鈞就回覆：「siu ma is the cutest 🤤」。之後湯洛雯就回覆of cuz兼加上馬嘅emoji。唔少網民見到之後都話佢哋好sweet，紛紛留言話：「so sweet💝💖」、「waa 唔冼sweet都咁啊‼️😳😎」、「哇，好sweet啊」及「awww.... so sweet! What a cute couple! ❤️」等等。