王君馨重提離巢TVB坦言冇損失 被甄子丹讚有火獲邀拍電影

現年36歲嘅王君馨（Grace）喺前年12月與無綫結束14年賓主關係，宣布正式離巢。最近佢重提離巢嘅決定，表示冇損失，仲話希望喺新嘅一年可以多啲陪老公同計劃生小朋友。

王君馨離巢後前往內地參加跳舞選秀節目《了不起的舞社》，不過因為疫情嘅關係，比賽不停延誤，直至早前先返香港同屋企人過年。喺逗留內地期間，有一日王晶打電話俾佢，話甄子丹電影《天龍八部之喬峰傳》有角色仲未搵到適合嘅人選，問佢有冇興趣寄CV俾佢，當晚就收到回覆，並知道係飾演「馬夫人」一角。

王君馨指拍攝《天龍八部之喬峰傳》最深刻嘅就係開工第一日，因為甄子丹問佢知唔知點解會選中佢，然後甄子丹就話見佢離巢TVB後，第一件事係去參加跳舞比賽，呢樣嘢令佢覺得君馨好有火同有熱情。而王君馨就表示離巢係一個唔容易嘅選擇，不過佢都選擇離開，因為可以去外面嘅世界尋找機會。被問到新一年有冇懷孕嘅計劃，王君馨就話順其自然。

現年36歲嘅王君馨，2007年參選《全美華埠小姐》獲得第一公主（亞軍），同年參選《香港小姐競選》獲得亞軍，而且仲獲得最上鏡小姐同國際親善小姐。加入無綫後，王君馨主要向演戲方面發展，機會不斷嘅佢多年嚟參演過唔少劇集演出，例如《刑警》、《熟男有惑》及《My盛Lady》等等。默默耕耘嘅Grace，去到16年終憑《城寨英雄》飾演花曼一角而人氣急升，喺劇集《是咁的，法官閣下》首次擔正做女一。不過去到上年播出嘅《超能使者》，擔任重要角色嘅佢竟然無份做宣傳，由一個重要嘅角色淪為閒角。有傳佢喺《超能使者》不被重視係佢離巢嘅導火線，雖然佢有向公司反映，不過公司就冇作出任何行動。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！