甜蜜蜜暑假 7月下午茶推介

大熱天時，總係想留喺冷氣嘅地方，約埋閨蜜歎返個下午茶就啱晒！今個7月，多間餐廳都推出咗啲特色下午茶，有優雅系、清甜系、健康系等等，實有款啱你心水啦！

優雅蝴蝶下午茶 Junon

軒仔間餐廳嘅下午茶一向都高質、破格，今次就以蝴蝶做主題，三層下午茶糕餅架用玫瑰、綠葉同精緻嘅刺繡蝴蝶做裝飾，好鬼靚！甜點走清新甜美路線，好似「粉紅櫻花奶凍」、「柑橘迷仔紙杯蛋糕」等，甜得嚟又夠fresh；而鹹點就走田園風格，如「煙三文魚玫瑰花配蘿蔔及檸檬忌廉」、「法式雜茶蝴蝶配金黃薯餅」等，一樣以花同蝴蝶做構思，少女心邊食邊散發！食完仲可以拎走一套兩款刺繡蝴蝶禮盒，慢慢回味~

A Little Life下午茶
供應期：即日起
時間：星期六、日及公眾假期15:00-17:30
價錢：$728 (二位用)

接骨木花利口酒下午茶 大堂酒廊

呢間酒店同全球首個法國接骨木花利口酒品牌St Germain合作，以接骨木花利口酒製作出一系列嘅特色甜品！接骨木花利口酒由多達1千朵新鮮、以人手採摘嘅接骨木花釀製而成，花香味十足！下午茶中有一款甜點同一款鹹點加入咗接骨木花利口酒﹕甜點「St Germain椰子百香果杯」中包括椰子奶凍、熱情果慕絲同St Germain啫喱等，夠晒清甜；而鹹點「St Germain鴨肝醬法式蘑菇泥及紅桑子果醬配軟包三文治」，三文治上有St Germain接骨木花利口酒造嘅啫喱，帶一絲絲嘅清甜，造型仲相當吸睛添～愛酒之人千祈唔好錯過用接骨木花利口酒調製嘅兩款限量cocktail呀！融合咗唔同水果，不論造型同味道都好fresh呀！

夏花盛放下午茶
供應期：即日起至9月13日
供應時間：星期一至四 15:00-18:00；星期五、六、日及公眾假期 14:15-16:15(首輪)、16:30-18:30(次輪)
價錢：$418(每位)；$698（二人用）

小王子下午茶 CURATOR BY LEX ART CAFÉ

睇過《小王子》嘅人都知，書中講述咗唔少人生道理，而呢間餐廳就從《小王子》中得到靈感，推出以「人生五味」為題嘅下午茶；鹹甜點包括朱古力慕斯馬卡龍、士多啤梨檸檬吉士撻、香辣雞肉牛油果醬三文治等，有齊晒酸甜苦辣鹹。點心用一個復古行李箱盛載，象徵小王子嘅星球旅程，而我哋就用舌頭去暢遊人生旅程啦～另外仲有以小王子獨家圖案作打印嘅咖啡或朱古力添，靚到唔捨得飲！每個套餐附送《小王子》獨家設計嘅postcard，書迷點可以錯過！？BTW 西環店都有得食。

Life is a Journey 小王子「人生五味」
供應期：即日起至8月31日
供應時間：15:00-18:00
價錢：$258 (每位)

健康養顏下午茶 The Tiffany Blue Box Café

講起Tiffany Blue，好多女生都會即刻變bling bling眼，諗起佢哋時尚、精緻嘅珠寶。而今次推出嘅下午茶除咗講求造型之外，仲講求健康添呀！下午茶以健康食材入饌，甜點除咗餐廳原有嘅甜品外，仲加入咗白桃奶凍、杞子士多啤梨，選用嘅材料各有美顏同養生嘅功效，貪靚嘅女生們就最like啦！鹹點方面都好有睇頭，例如松葉蟹肉吐司、鮮蝦銅鑼燒、脆炸意大利飯等。

TIFFANY T1 下午茶
供應期：即日起
供應時間：14:00-18:45
價錢：$688 (二人用)

福岡X法式糕點 DALLOYAU

咁耐冇飛日本，一定好掛住日本嘅味道啦！呢間殿堂級糕點品牌為咗令大家一解鄉愁，今次就推出以福岡特色食材為題嘅下午茶，好似豆腐抹茶泡芙、林檎味噌蘋果酥、福岡夏柑法式班戟等，將福岡食材融入法式甜品當中，盡顯心思！而鹹點方面就提供一系列法式小食，例如煙三文魚撻、鴨肝三文治等，一次過滿足晒飛法國、日本嘅願望呀！

福岡特色下午茶
供應期：即日起至8月31日
供應時間：15:00-18:00
價錢：$268(每位)

傳統馬拉甜品 The Envoy

下午茶唔一定下下都西、日式嘅，東南亞一樣得！呢間餐廳選用馬來西亞嘅甜鹹點，甜點有「Pandan Chiffon Roll」、「Malaysian Coconut Mango Macaroon」等，前者選用傳統椰醬同斑蘭葉，後者用一絲絲嘅椰子肉製成，馬拉味十足！鹹點就有豬肉炸春卷、意大利巴馬火腿三文治等，配返杯斑蘭latte，成件事chill爆！特別講講，套餐一共8個鹹點同6個甜點，仲模仿港式茶樓嘅「點心紙」落單，大家可以按個人喜好選擇想食邊款，認真貼心～

全新下午茶
供應期：即日起至8月31日
供應時間：星期一至五15:00-17:30；星期六、日及公眾假期 16:00-17:30
價錢：$170 （每位）

文﹕Kiko
編：Kar