【留家抗疫】呢班明星藝人喺屋企抗疫搞啲乜 各有所好多姿多采

·2 分鐘 (閱讀時間)

新冠肺炎疫情持續擴散,各行各業都受到唔同程度嘅影響,而娛樂圈都不能倖免。政府呼籲大家盡量減少外出,唔少藝人都選擇留喺屋企避炎。咁不如我哋就睇下一班藝人在家抗疫搞啲乜啦~

做廚神整返兩味

唔少藝人平時都忙到冇時間下廚,不過喺抗疫期間就化身廚神,仲上載下廚過程及美食圖片/影片到社交網站。容祖兒早前每日拍片分享親自炮製嘅「祖餐」,當中包括Miffy煎雙蛋、芝士奄列牛油果多士及勁矛盾雙子燕麥早餐等等。黃伊汶就除咗分享佢自家製嘅吉列豬扒咖喱飯照片,仲有埋烹調方法俾大家參考。周勵淇親自下廚煮炒銀針粉及豉油王炒腸粉,同樣煮得有板有眼㗎。另外,楊千嬅喺現實都係一個「多功能老婆」,佢喺居家隔離期間,經常為老公及囝囝煮大餐,仲食到佢哋讚不絕口。

容祖兒
容祖兒

瘋狂煲劇

喺屋企時間流流長,煲劇都係一個好好嘅選擇。張繼聰喺早前已經大讚台劇《想見你》好好睇,而佢喺幾日前再同老婆謝安琪睇多一次。除咗同老婆睇《想見你》之外,張繼聰仲有陪囡囡睇卡通片Barbie。而田蕊妮喺早前就話宅咗係屋企兩個幾月晚晚去Netflix搵嘢睇,就開咗韓劇《梨泰園class》嚟煲,之後仲大讚好好睇。

張繼聰
張繼聰

做運動

一向熱愛運動嘅鄭秀文就留喺屋企做運動,仲上載多條短片到社交網站同大家分享,兼提醒網民喺屋企做運動要小心,唔可以心急同超越負荷。另外,關智斌(Kenny)同樣亦上載多條運動短片到社交網站。

鄭秀文
鄭秀文

享受家庭樂

既然多咗時間喺屋企,藝人們當然好好享受親子樂啦!蔡一智就同囝囝喺屋企紙皮上畫畫。而官恩娜亦準備咗好多遊戲俾仔女玩,仲幫仔仔剪埋早排好受觀迎嘅「栗子頭」髮型。黃心美就全職專心照顧BB,成個IG都係佢同姨甥女「豆豆」嘅合照,睇得出呢個大姨媽真係好錫姨甥女呀!

黃心美
黃心美


另外,陳瀅早前就上載浸浴短片,並留言話:「stay at home and pamper yourself with a home spa。」;而《東張西望》主持阮嘉敏就選擇砌模型,一砌就砌一座巨型城堡。

阮嘉敏
阮嘉敏