【留家抗疫】明星藝人齊上載青澀舊照 一齊分享那些年

新冠肺炎疫情席捲全球，唔少人都留家抗疫，一班明星藝人都唔例外。近日唔少藝人仲上載自己嘅舊照去個人社交網站，結果引來網民們瘋狂留言。而家就同大家睇下呢班藝人嘅青澀舊照啦！

蔡卓妍
喺噚日，蔡卓妍（阿SA）上載咗幾張童年照片，並留言話：「喺屋企最好嘅活動就係執嘢！我老竇呢幾日搵到啲出土文物 小學五年班嘅我同啲同學仔！仍然有聯絡嘅只係得兩個 （如果你發現自己係呢張相裏面請pm我😁）」唔少網民睇完都大讚佢好可愛同由細靚到大。

梁詠琪
被封「永遠的短髮女神」嘅梁詠琪（Gigi），除咗喺電影《賭神3之少年賭神》以長髮示人之外，其餘時間都係短頭髮。喺噚日，Gigi就上載咗幾張佢喺90年代留長髮嘅清純照片，並留言話：「朋友整理了一些90年代的舊照片給我，太珍貴！十幾歲時鍾意留長頭髮，不過不喜歡花時間整理，什麼燙髮染髮甚至連剪髮都懶得去弄，總之就是個非常天然青春的少女😂...所以18歲初嘗短髮的一剪後💇🏻‍♀️，自然地這個長髮look從此成為絕響（不包括少年賭神🥴）。 連Sofia見到這些照片都拋下了最理性中肯的一句：
“Well....it’s not your style ! 🤣🤣🤣」一班網民留言大讚佢好靚女同係天然美女之外，連好友鄭秀文都忍唔住留言回覆：「好清秀。完全𣎴化妝，五官都已經很精緻。」

陳瀅
「宅男女神」陳瀅（Jeannie）早前喺加拿大返港，喺家中隔離期間，佢就上載咗佢嘅童年、青春期及大學畢業嘅相片同大家分享，唔少網民都紛紛留言大讚佢個樣冇變過、由細靚到大同埋好靚女等等。

吳海昕
憑ViuTV穿越劇集《二月廿九》成功彈起嘅吳海昕（Sofiee），早前佢就上載咗一張童年照片去社交網站，唔少網民睇完都大讚佢可愛。

胡鴻鈞
多次惹整容疑雲嘅胡鴻鈞，喺自己生日嘅第二日上載咗兩張18歲嘅學生照片，並留言話：「30歲嘅第二日，睇番自己當年18歲嘅相，認真諗唔明 我擺呢兩個pose個陣，係諗緊咩 …」唔少網民睇完都話佢當時好瘦同埋個樣冇咩點變。

傅穎
傅穎（Theresa）多年嚟都經常被人指整容，仲批評佢塊面越嚟越膠。喺早幾日佢趁住疫情留喺屋企，佢就上載咗一張2002年出道時嘅照片，仲留言話：「攝於2002年，第一部電影《9個女仔一隻鬼》。今天決定把儲存了許久的照片轉為數碼檔，為家裏騰出更多的空間，早於3年前就丟掉了一大堆，但我確實有不捨，才會待到今天把剩餘的貫徹執行。網絡發達的時代，數碼化是大勢所趨，把相片save到hard disc裏確實更方便，也不佔空間，很好啊！只是有些粉絲做的相冊，寫滿了溫馨的字句，這才讓我卻步，保留了一些。」

林盛斌
林盛斌（Bob）喺早兩日就上載一張17年前嘅照片，除咗感恩當年SARS時去咗電台做PA之外，佢仲重提當年出街成日俾人誤認佢係快必（譚得志）。

林夏薇
喺幾日前，林夏薇就上載咗一張童年萌照，並留言話：「只有在回想過去的時候，才驚覺已經度過了最無憂無慮的年少時光～小薇，你好👋！我好想你！❤️#童年回憶」唔少網民睇完都大讚佢細個好得意同好可愛。

張沛樂（沙律）
早幾日，「巴打女神」張沛樂（沙律）喺社交網站上載童年cute cute相片，並留言話：「回望小時候的照片會想，這是我嗎？最似我想只有臉型和蝦餃下巴，眼睛不太像，但保留好惡的眼神，嘴巴仍然好細，嘴角下垂😾，但拼起來和現在差好遠呢🤣」

曾樂彤
2018年新人曾樂彤都喺社交網站上載童年可愛相片，並留言話：「呢個笑容同手勢一定係應付緊阿媽 #小丸子沙龍照 #sharemychildhood」唔少網民睇完相片都讚佢得意同好pure。