疫境冇工開 藝人齊變KOL
疫情令演藝圈工作量大減,唔少藝人立即諗計「自救」,加入KOL行列頻頻拍片,成功殺出一條新血路!
余思霆
前華姐冠軍余思霆近年經常孖住男友朱敏瀚,齊齊亮相網上節目大玩「狼人殺」成功引起關注,近日佢更開設個人頻道,使出「拿手絕技」,拍片記錄喺台灣潛水嘅點滴,不時以性感水着上陣,引死一班宅男!
鄧月平
藝人鄧月平(Larine)今年喺ViuTV節目《辣伙頭》大騷出眾廚藝,成功勇奪冠軍,自此開啟其「廚神」之路,近日佢就拍片分享下廚心得,獲網友激讚手勢拍得住專業廚師。
王君馨
藝人王君馨(Grace)其實早喺前年已經擁有自己嘅頻道,不過只係拍咗幾條片就冇再更新,直至疫情殺到,佢就「急起直追」不斷出片,主力分享個人成長故事,包括同老公嘅相愛經歷、讀書時被欺凌等,內容非常豐富!
崔碧珈
擁有36G導彈上圍嘅藝人崔碧珈(Anita),平時毫不吝嗇騷身材,近日佢卻「封胸」,拍片教英文,改行知識型KOL路線一樣咁受歡迎。
楊丞琳
至於台灣方面嘅代表就有歌手楊丞琳,佢拍Vlog記錄日常生活及拍節目時嘅幕後花絮,其中佢推出首條Vlog即爆紅,至今累積逾130萬觀看次數,仲吸引埋台灣林柏昇照抄翻拍「神還原」,風頭一時無兩!