要求TVB公開回應期限今日屆滿 小股東聯盟連環爆TVB內幕 聲稱投訴獲通訊局受理

日前有自稱「大台小股東大聯盟」嘅網民，喺facebook建立專頁，並且發表公開信力數TVB近年七宗罪，仲要求管理層本周五前作公開回應。而TVB日前發聲明指公開信內容毫無根據，予以強烈否認並保留追究權利。大聯盟發公開信後曾經召開記者會，代表亦公開現身，當中包括曾反對TVB回購股份嘅傳奇影業高層童煒晉。

大聯盟要求TVB回應嘅限期今日屆滿，而TVB暫時未有任何行動。大聯盟呢一兩日就接連爆料，將上次喺公開信力數TVB管理層近年管理不當嘅「七宗罪」，講出更多詳情。當中包括早年TVB股權易手嘅內情，以及近年TVB多宗與不同機構合作項目出現虧損嘅情況。大聯盟嘅貼文指TVB同一間名為Imagine Entertainment嘅公司合作拍美劇，但係成立6年來劇集未見大受歡迎，反而為TVB帶來負債。另外近年TVB有份嘅內地串流平台「埋堆堆」，大聯盟指平台會員人數超過6百萬，收入至少6億人民幣，質疑居然未能為連年虧蝕嘅TVB作出貢獻。

大聯盟尋日亦發文，指已經收到通訊事務管理局通知，確認收到投訴，通訊局會按照廣播條例嘅規定處理。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！