Yahoo奇摩新聞 【電影LOL．外語930】冇得飛 睇《再單身遊記》學習愛自己
呢一年香港人經歷好多好多，由反修例到現時新型冠狀病毒肆虐，每個人唔多唔少都受到衝撃，特別年輕一群今年絕對係極速成長嘅一年。相信好多人希望生活盡快回復正常，可以放心笑、安心同朋友聚會甚至再次踏上旅途，放眼世界。
全球暫時仍處於封關狀態，限制出入境以控制疫情。唔飛得嘅日子，大家不如睇下旅行電影望梅止渴，今日想同大家重溫2010年電影，由茱莉亞羅拔絲主演、Ryan Murphy執導嘅《再單身遊記》（Eat Pray Love)。故事改編自Elizabeth Gilbert同名自傳遊記，講述Liz (茱莉亞羅拔絲飾演)擁有現代女性夢寐以求的一切﹕有車有樓、婚姻以及事業。
事事順利的Liz卻感到若有所失，迷失於婚姻、生活中，過住人人豔羨嘅日子，Liz卻晚晚以淚洗面。困惑嘅佢決定走出去放手一搏，離婚再出發，旅行一年好好犒賞自己。Liz先出發意大利邊學意大利文、學習無所事事，唔再執著在意別人對自己身型外貌嘅睇法後，終於學識好好享受美食，pizza、意粉從此食落有味！
學識食之後，轉而踏足印度展開自我探索之旅，參加禪修營，做瑜伽、冥想，希望可以得到啟發。期間遇上智者亦遇上來自美國德州，因為酗酒嗜賭而失去妻兒嘅Richard（Richard Jenkin飾），學識如何寬恕自己。最後出發到峇里，在此享受美麗風光之餘，與Felipe（Javier Bardem飾）嘅相遇，再次接受愛情！
《再單身遊記》一書推出時成為唔少女性嘅聖經，萌起找尋自我覺醒之旅，不過尋找自我唔一定要去旅行。但今時今日，疫情、政局、經濟前景全部唔明朗嘅情況下，出外走走品嘗美食，絕對係值得寄望嘅美事。
更多電影文章
【電影LOL】Lady Gaga越級挑戰爭影后 演繹買兇殺夫狠毒貴婦
【電影LOL】疫情之下Netflix最多人睇嘅係呢套10年前舊片？！
