Yahoo奇摩新聞 【電影LOL】內地買亦舒《流金歲月》拍劇 演曼玉同紅姑嘅會係……
世界各地影視行業都好興買外來作品版權改編，即使當地創作人才唔少，俾錢買，最起碼老闆知道故事上文下理，唔駛等編劇出晒劇本先知有冇贏面，睇落好似好方便。
內地有製作單位買下香港著名作家亦舒小說《流金歲月》嘅版權，將佢拍成電視劇，唔駛問故事嘅香港背景一定無咗，會改成內地大城市，唔係上海就係北京。
《流金歲月》劇集將由秦雯編劇、沈嚴執導，同一個幕後班底喺2017年已經改編過亦舒嘅《我的前半生》做劇集，由靳東、馬伊俐、袁泉等主演，當時收視仲好好，稱得上係「爆款」劇集。不過如果係上內地百度、豆瓣呢啲龍頭網站睇劇集資訊，你係唔會搵到劇集改編自亦舒小說呢啲描述，唔知以為佢地原創咗個好劇本！
不過明顯食過翻尋味，先至再次改編亦舒作品。《流金歲月》講述蔣南孫及朱鎖鎖由學生時代開始十年時間嘅人生經歷與遭遇。南孫家中保守，重男輕女，循規蹈矩嘅佢努力讀書、由低做起，一步一步建立自己嘅事業；而鎖鎖自幼寄人籬下，生活條件一般，但善於利用自身條件改善生活，哪怕做舞女、富豪情婦，理直氣壯為自己謀求更好嘅生活。無論兩人際遇、性格幾咁唔同，唯一不變係兩人友誼依舊，互相扶持對方嘅選擇。
《流金歲月》本身有個經典版本，楊凡導演喺1988年將佢改成電影，搵嚟當時青春無敵嘅張曼玉及鍾楚紅分別飾演蔣南孫及朱鎖鎖，電影中嘅感情線比較重戲，較多篇幅描寫兩女與代表完美嘅家明之間嘅愛情故事。今日《流金歲月》拍成電視劇，迎合返今日價值觀，當中有唔少背景需要改動，例如鎖鎖做夜總會舞女、做人情婦呢啲設定未必過到內地審查，不過最怕係要同張曼玉、鍾楚紅神枱級女神做比較！
劇集確定由劉詩詩飾演蔣南孫、倪妮飾演朱鎖鎖。2位女星靚就幾靚，不過好似少咗啲風情！同劇仲有楊祐寧、董子健及陳道明演出，選角暫時睇都幾吸引。劇集已經開機，估計會無咩香港元素。亦舒迷想睇下出嚟效果係點就麻煩等一等，未睇原著嘅可以睇定書先，等劇集出街就知2個版本有幾唔同。
更多電影文章
【電影LOL】勁juicy奇案紀錄片Tiger King大熱 搞到殺人懸案重新開file
【電影LOL．外語930】Irrfan Khan《少年Pi》以外的作品《美味情書》午餐愛的故事
