鱷魚ê目屎

枵鬼假細膩，騙選票ê撇步koh有影進步！宋á楚瑜會hōe失禮，有影是獨裁者ê奇巧愈來愈恐怖。台灣人若心落軟，tō注定1世人做人奴才。伊所講--ê，咱無leh相信伊是真心--ê。總--是，咱驚濟濟台灣人hō͘ 伊騙騙去。台灣人過去àn-chóaⁿ hông洗腦，想欲平靜生活ê ǹg-bāng，你我望天公伯ah是上帝，kàu taⁿ iû-goân看無未來，無得著任何ê啟應。尾á，koh是老猴搬戲，提gín-á ê未來leh poa̍h。伊若有知覺過去種種ê罪gia̍t，tō無應該koh再攪亂正義轉型。出來hōe，ē-sái。退出政壇，好好成做1 ê台灣人！M̄-thang提國外ê護照欲kap人選總統，咱chiah相信伊ê真心！ Kho̍k-hî ê目屎是1種chng-thāⁿ，siáu鬼á殼下面是奸鬼ê笑容，算計伊人生最後1 chhut大戲。台灣人gōng-gōng-á看，gōng-gōng-á聽伊虛華ê話語，是真是假？過去記錄，kám袂驚人？人會hiah 簡單烏變白？咱tiāⁿ kap 厝內人講，目前囝孫kap阿公阿媽無法度建立感情，siōng大 ê罪人tō是宋phàn-ê。這是台灣人無法度建立ka-tī ê認同，語言消失，民族tō死ah。 進前楊實秋講宋叛ê是「禁止方言」無「禁止台語」，到taⁿ koh 欲chèⁿ！Koh欲講he欲hō͘台灣各種族群互相對抗ê話。過去親民黨kám有對母語有siáⁿ提案，有siáⁿ-mi̍h貢獻？這kám tō ài現此時chiah來講歹勢？是leh歹勢siáⁿ-mi̍h tāi-chì？免交代清楚nih！過去馬英九七冬，伊lóng無捌講過1句soah顛倒支持，kàu日頭花運動kap最近高中生抗議，看見國民黨欲倒ah，pān勢無tú好，有好khang thang khioh ah，chiah趕時行湊熱鬧，假無意欲phah國民黨政權，割稻á尾! Bô-gî-ngō͘，政治láu-á niā-niā。在來台灣2字kan-taⁿ有路用ê時，chiah ùi pùn-sò桶khioh --tńg-來。 這幾冬，台灣政治環境tek-khak有變。總--是，無hit款仙丹妙藥，萬事tō 1步1步行。佇轉型正義完成進前，絕對袂使相信國民黨，新黨，親民黨，民國黨chia ê寄生殖民政黨。Lóng是àu臭ê殭屍政客，有體無靈魂。選舉到ah，開始假hó-soe，講了解台灣人ê想法欲來改變。台灣kám 一定需要伊來改變？看國民黨六七十年ê執政，宋phàn--ê mā算在內lah，sì-kè iā錢顧tiāu-á-kha。台灣目前hiah亂，伊算是排前幾名ê罪人。Soah食到七老八老，koh講欲為台灣phah-piàⁿ，che話hām狗tō聽袂落。是準做台灣lóng無少年輩？欲繼續舞in ê未來？是lah，陳文成事件mā ài算去伊ê頭khak頂。2004年選舉選輸，心狂火to̍h sì-kè亂，kàu-taⁿ，皇帝夢koh iáu-bōe放棄，欲kā 台灣人ê血 suh kah ta-ta-ta，骨kheh kah無chhun chiah甘願放。台灣人欠伊nih！Koh選落去，破記錄lah！咱ē-tàng 想伊主要ê目地hoān-sè 是立委ê票niâ-tiāⁿ，做1 ê地下操控者。看伊目前三不五時tio̍h tō 欲kā柯文哲khiú sio-óa tō知。選舉步數niâ！ 是lah，若是現此時koh戒嚴，我寫台文，ài hông罰錢，lia̍h去關，hoān-sè 生命tō無去。這lóng是宋phàn--ê至高無上ê威權！Kho̍k-hî ê目屎免開錢買koh好用，台灣人心軟講ài理性和平，和解…，講kah pháiⁿ聽是奴才性猶袂斷根。詩人泰戈爾講過1句話，『古早ê chí 生命原在，芽藏佇深層ê所在，kan-taⁿ ài 新時代ê肥塗來播。』咱無希望親像宋phàn--ê chit 款政治láu-á tī 台灣hiah皂烏漆白，拖死囝á ê未來，ǹg-bāng ta̍k-ke tio̍h覺醒。