CMHK 超值 80GB 儲值卡測試:速度足 21Mbps、$30 蚊就買到抵到爛!

文章來源:Qooah.com

而家嘅手機,基本上都有雙 SIM 卡設計,所以好多人都會買定一兩張儲值卡放第二個卡槽度做後備用,或者專用來上網睇片燒 Data 用。上星期我地報導過 CMHK 最近推出咗一張 CP 值超高嘅儲值卡,呢張卡一上架即時俾人掃晒,今次我地就搶到一張同大家做個測試。

CMHK 今次新推出嘅呢張「本地月費儲值卡」有唔少吸引之處,首先當然係售價。張卡原價係 $88 包 80GB 4G 本地數據,最高 21Mbps。睇落貴喎,不過好在而家做緊特價:只需 $60!而由 5 月 11 日至今年年底 12 月 31 日期間更可享「買一送一」優惠,即係平均每張卡只需 $30 喳,真係一個飯盒嘅價錢都唔洗就買到張 80GB 嘅數據儲值卡俾你慢慢燒。

▲ 認住呢張卡:原價 $88 蚊,限時優惠價只需 $60 蚊,期間限定再買一送一,啫平均一張只需 $30 蚊!

▲ 除咗有 30日 80GB 21Mpbs 4G 流動數據,再包埋貓頭鷹時段(11PM – 7AM)任用數據、1,000 分鐘本地通話以及 10 個本地網內短訊,仲有豁免行政費。

講返張卡,好多人可能覺得儲存卡會唔會特別慢架?而張卡標榜最高速度為 21Mbps 足唔足呢?呢個速度又夠唔夠大家日常使用呢?我地就來測試一下啦:

▲ 要測試網絡速度當然要用最多人跑速嘅 SpeedTest 手機 App,Winson 是在自己家中 (大埔區) 進行實測。第一次測試 (上圖左),下載速度為 20.1Mbps,而第二次測試 (上圖右),下載速度更超越了 21Mbps 達到 25.7Mbps。

▲ 再用埋香港通訊管理局出嘅 OFCA 網速測試 App,第一次測試下載已經超過了張卡標榜的 21Mbps 速度,下載達 23.0Mbps。第二次測試,下載速度再提升一點點至 23.7Mbps

結論:由兩套程式實測可見,張卡嘅上網速度足 21Mbps 有凸。不過當然,網絡速度快慢受好多因素影響,如果閣下身處一些接收不太好的位置速度就自然會有所影響。不過想講嘅係,經過實測可以肯定呢張卡嘅速度絕對無花無假。

▲ 最後測試一下影片播放,喺 YouTube 收睇 Error 嘅 I Promise,畫質設定至 1080p 全高清。可見 21Mbps 速度對睇片完全可以勝任有餘,即使前後拉動快速前進或後退播放都可以即時載入,唔洗等慢慢 Load。

CMHK 呢張「本地月費儲值卡」現時已經喺各惠康超市分店上架,大家見到就要快手買啦,聽講非常搶手,好快畀人掃晒。

為您推薦更多相關文章:

更多推薦文章在:Qooah.com

Like/讚好以獲得全面資訊:Qooah Facebook