【台語世界／錄音】亞泥案hông硬過手 監院：官廳坐權力椅leh睏

是按怎欲揀這篇： 山河不在國家破，草木深ōm城春來。空hip頭手師齊柏林6--月過身，koh一擺提醒lán關心tsit片土地、照顧住民ê權益。Lán tio̍h繼續監督政府修訂《礦業法》、《環評法》，m̄-thang hōo官廳坐權力椅leh睏，美麗台灣tsiah thang倒轉--來。 亞泥案閃避環保評估、硬hōo礦業權展限（tián-hān）ê代誌惹人議論，進前環保團體提訴願hông駁回，10月12出現重大tńg-se̍h。監察院指出，經濟部leh審ê時，無去注意礦區內底有可能發生塗tshuah流ê溪流kap地質敏感區，承辦人員上網查詢了後就主意、siunn過凊彩，花蓮縣政府ê贌地政策mā有tîng-tânn，bē輸「坐權力椅leh睏（註一）」。Suà--落-來檢察官beh調查，監察院mā要求行政院ài kā督促檢討改良。 監察委員林雅鋒表示，經濟部前部長李世光tī今年3--月允准，hōo亞泥花蓮新城山礦埕（屬遠東集團ê紅毛塗企業）ê礦業權展限，kan-na三個月半就快速通過，引起社會議論紛紛。Hit-tsūn前行政院長林全要求李世光ài重koh考慮調查，監察院mā kā經濟部討卷宗（kuàn-tsong）來詳細看，發見真濟經濟部認定「無問題、無tîng-tânn」ê所在，可能有刁工掩崁一寡要緊ê資訊、有無實在ê報告。林雅鋒講，tse內底ài稽考（khe-khó）ê代誌iáu-koh真濟。 林雅鋒表示，礦業權是特許（ti̍k-hí）ê行政處分，需要看重公益原則，m̄-koh案件審理ê時，經濟部明明知影礦區內有三條有塗tshuah流勢ê溪流，suah無要求亞泥調查，影響四箍輾轉徛家ê安全。Koh-khah hàm--ê是，所有kap環保相關ê疑處調查，竟然是一个基層公務員負責--ê，而且hōo伊家己上網查詢，決定kám有需要做地質調查kap安全評估；tse m̄-nā thang看出經濟部礦務局無看重環保，mā無ha̍h審查程序，現現就無照起工。 監察院ê調查報告koh指出，花蓮縣政府原本講beh維護自然環境生態永續發展，無應允人贌地挖礦，suah無照民事訴訟程序，要求亞泥還土地，koh展限hōo in繼續使用，政策實在是tshia-pua̍h-píng。而且tsit个礦區100％ kap原住民保留地重疊，縣政府無照《原住民族基本法》第二十一條ê規定，kap原住民部落參詳，hōo in同意ia̍h參與討論，致使《原基法》保障原住民土地、自然資源ê精神無--去，tse mā是無「依法行政」ê失錯。 林雅鋒講，調查官khai真濟時間，tsiok頂真leh看tsit个案件所有ê資料，發見真濟有問題ê所在；經濟部leh審ê時，suah lóng無看--著，實在hiau-hīng。伊mā強調，in bat請經濟部到監察院來說明，m̄-koh針對環保ê項目lóng講bē清楚，挖礦kah是特許--ê，就應該tī經濟發展kap生態保育中ng lia̍h平衡，花蓮縣政府、經濟部kap行政院án-ne「坐權力椅leh睏」，應該檢討。 讀予你聽： 註一：原文是『坐在權力上睡覺』。 註二：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢；『 』內底用華語發音。 請參照【華語原文】 延伸閱讀： 台灣空hip頭手師齊柏林ê遺作，顯示亞泥新城山礦埕比五冬前伊hip「看見台灣」ê時，挖kah愈深--ah（多羅滿賞鯨面冊專頁） 反亞泥運動持續20餘年，今千人上街怒吼「還我土地」（關鍵評論） 礦權展限、礦區面積沒共識，《礦業法》初審進度到哪兒？（關鍵評論） 若欲投稿，請寄：binpotgb@gmail.com，文章字數 600-800；文章若採用，有淡薄仔稿費。 請上【台語世界】閱讀閣較濟相關文章。 專欄屬作者個人意見，文責歸屬作者，本報提供意見交流平台，不代表本報立場。