【台語世界/錄音】閃『狼師』靠良民證,kám bē傷害人權?

【台語世界/錄音】閃『狼師』靠良民證,kám bē傷害人權?

是按怎欲揀這篇: 作家林奕含ê著作kap伊行短路ê相關案件,hōo社會koh再致重『狼師』議題,立法院mā隨通過『防狼師條款』。M̄-koh持防犯罪kap維護人權中央ê平衡pênn-pāng beh按怎來準?作者提出伊對良民證ê看法,hōo lán做伙來思考。 最近開學,我看一kuá代課iah-sī代理老師去申請「良民證」(註一);所謂「良民證」是警察局開ê證明,證明你過去bô刑事記錄。是講,有「良民證」tō永遠是良民?有前科tō bē變好?司法kám m̄-bat冤枉--人?社會kám bô beh hōo犯法--過ê人機會?過頭使用「良民證」kám bē傷害人權? 差不多五冬前,我tī國小教冊,tō bat hōo學校要求交「良民證」。校方講tsit-má有『狼師』ê問題,所以ài有「良民證」才敢聘。我m̄知這是m̄是真正ê理由,mā m̄知是siáng ê規定、有合法--bô,m̄-koh我認為這對避免『狼師』作用bô大。Koh再講,一个人犯罪已經受刑罰,tsit-má koh用tse來限制伊揣頭路ê權利,變成一个罪罰兩pái,koh斬斷一个人自新ê路,我感覺bô kài妥當。 避免犯罪是ài有避免ê機制,m̄是靠hit張「良民證」。人犯罪m̄是生--lo̍h-lâi tō有--ê,未犯罪前lóng是良民。Án-ne ê意思是beh講tsit-má ê良民,並無保證未來bē犯罪,所以有「良民證」mā無保證bē犯罪。靠hit張「良民證」ē-tàng保證siánn-mi̍h?講khah白--leh,是出tāi-tsì ê時,學校the責任用--ê niâ。 用避免『狼師』tsit件tāi-tsì做例,若嚴格規定老師kap學生bē-sái單獨鬥陣,顛倒khah實在。人有感情有情慾,師生單獨鬥陣gâu起戇想;若戇想一下起,可能tō bē去想ka-tī是m̄是良民--ah。咱看報紙,tiānn有形象bē-bái ê人hông piak出àu臭ê代誌,in kám lóng m̄是「良民」?Kám lóng是有前科--ê?嚴禁單獨鬥陣,是siōng有效ê辦法;嚴禁m̄-sī kā處罰,是kā警告。假使師生需要單獨鬥陣ê時,ài代先報備,tse mā是leh保護老師kap學生。Án-ne thang先避免tāi-tsì ê發生,比事後用「良民證」來the責任khah有效。 事實上,「良民證」避免犯罪ê作用無大;若用kah siunn過頭,顛倒ài煩惱hōo威權獨裁ê執政者利用。Koh再講,憲法保障人ê工作權,若有特定ê khang-khuè iah-sī場合需要用「良民證」--ê,應該ài有條件限制,mā ài有補救ê辦法。 讀予你聽: (作者是台灣羅馬字協會理事;本文由台灣羅馬字協會提供。) 註一:正式名稱是「警察刑事紀錄證明書」。 註二:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢;『 』內底用華語發音。 請參照【傳統白話字版】 延伸閱讀: 「防狼師條款」三讀通過:補習班老師、員工未來全都必須實名制(關鍵評論) 沒有當事人的處分:「林奕含案」陳國星不起訴的5點理由(關鍵評論) 良民證不良於民(NOWnews) 若欲投稿,請寄:binpotgb@gmail.com,文章字數 600-800;文章若採用,有淡薄仔稿費。 請上【台語世界】閱讀閣較濟相關文章。 專欄屬作者個人意見,文責歸屬作者,本報提供意見交流平台,不代表本報立場。