【台語世界/錄音】勞團m̄是勞工,勞工m̄是勞團

【台語世界/錄音】勞團m̄是勞工,勞工m̄是勞團

是按怎欲揀這篇: 仝款一條法律ê修正案,資方kap勞方兩款心tsiânn;是徛tī雞卵ia̍h石頭佗一爿,m̄免問天問家己。總--是,正義ê旅途罩bông霧,ǹg望民主來tshiō路,ē-tàng行上街頭、表達家己ê意見kap心聲,uan-na是台灣社會上suí-khuì ê風景。 我行街頭抗議幾若十年,看著一年來ê街頭抗議,實在是感慨萬千。頭起先是華航工會,suà--落-來是18% ê新老賊,koh來是勞團,ē-sái講是「好種m̄傳,歹種m̄斷(hó tsíng m̄ thn̂g, pháinn tsíng m̄ tn̄g),愈來愈m̄是款。 華航工會因為新舊政權交接,舊政權放hōo伊拖屎連(thua-sái-liân),tsiah hōo hia-ê『顏值』真kuân ê空中小姐少爺得過手,我m̄知『顏值』ê 台語按怎講,我總知影「好頭好面臭尻川」,hngh! M̄管是新老賊也好,『八百劣士』也好,in就是臭頭雞仔無人緣,tī世大運ê時tsūn表演siunn過頭,即時變做「路邊ê尿桶,眾人suān」,即時消風失蹤。 Koh來就是勞團ê大齣戲,表演年外iáu無想beh煞鼓,真真是àu戲拖棚。 頭一齣,in講「原本」有七工ê年假bē-sái刪除,tsit內底有教師節,教師無歇假,工人歇啥mih假?Koh有臭頭石ê聖誕假,是beh歇假懷念伊刣真濟台灣人是--m̄?Koh再講,過去十年來,in總--啊共--啊(tsóng--ah kiōng--ah)tsiah歇三工ê年假,m̄是七十工,in ê「原本」m̄知按怎算--ê?我想來去倒(siūnn-lâi khì-tò),kan-na ē-tàng講:「天無照甲子,勞團無照情理」。貪財iau-sâi,hōo人笑姿勢bái mā無要緊。 Koh來講加班一點鐘算四點鐘、五點鐘算八點鐘。Tse是kā頭家罰錢,m̄是加班費,致使頭家ài另外tshiànn外口ê臨時工來加班,內面ê工人suah tio̍h去別間揣臨時工來補貼無--去ê加班。Tsit款制度是世界奇聞,勞團是世界第一ê天兵天才。 上kài顧人怨--ê就是一例一休,就是bē-sái連suà上班七工,tse是硬piang-piang、tīng-khok-khok ê規定,一點仔伸勼(tshun-kiu)to無。我ē記得華航罷工ê時,總統坐華航出去做外交,一大堆華航員工ài tuè伊去,koh是一去超過十外工。Tann害--ah,一--來in bē-tàng參加罷工,二--來in違反一例一休,總統tshuā頭違規。 結果neh?員工無參加罷工,hōo工會處罰,tse有符合烏社會幫派ê規矩,合情合理。M̄-koh總統iáu無受著處罰,tse是勞動部袒親(thán-tshin),『實質影響力』。 有一句話án-ne講:「鹿耳門迎媽祖,mih旗to有」,mih旗to有就是啥mih旗to有,kap「mih奇to有」仝音,就是啥mih奇怪to有,就是無奇不有。我看一年來勞團ê神奇演出,總算悟出「勞團m̄是勞工,勞工m̄是勞團」ê道理來。 ☆詞彙學習☆ 【好種m̄傳,歹種m̄斷】hó tsíng m̄ thn̂g, pháinn tsíng m̄ tn̄g:『一代不如一代』 【拖屎連】thua-sái-liân:『擺爛』 【想來去倒】siūnn-lâi khì-tò:『左思右想』 【iau-sâi】『貪吃,貪心』 【伸勼】tshun-kiu:『伸縮,緩衝』 【袒親】thán-tshin:『偏坦,護短』 讀予你聽: (作者是李江却台語文教基金會董事長,有kap陳憲國合編《台灣諺語典》、《華語台語對照典》;本文由李江却台語文教基金會提供。) 註:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢;『 』內底用華語發音。 延伸閱讀: ・【功德台灣】《勞基法》再戰立法院,到底改了什麼讓勞工不甘願做?(關鍵評論) ・因應一例一休對策(《產業雜誌》,tse是「中華民國全國工業總會」出版ê刊物,一般ti̍k thang代表台灣資本家ê意見) 若欲投稿,請寄:binpotgb@gmail.com,文章字數 600-800;文章若採用,有淡薄仔稿費。 請上【台語世界】閱讀閣較濟相關文章。 專欄屬作者個人意見,文責歸屬作者,本報提供意見交流平台,不代表本報立場