MIRROR演唱會事故︳受傷舞者Zisac首度發文 間接證實綵排時有人受傷

MIRROR演唱會第4場發生屏幕墮下事故，事後有份演出嘅24位舞者聯署聲明，提到今次演唱會有3位舞者受傷，包括阿Mo（李啟言）、張梓峯（阿峯）及羅德智(Zisac）。事發後一直未有發聲嘅Zisac，尋晚亦都首次喺IG發文。

Zisac post出一張演唱會後台工作證，並寫道「呢個Show 雖然我最後無上過台on performance ／但絕對要留個記念／無諗過24個人可以咁一條心／將來我地24個一定可以一齊行返上台／連埋12子，36個一體！／最後希望所有受傷既人 無論身體心靈精神 都早日恢復／好好過日子 We are One and All」。MIRROR嘅Frankie（陳瑞輝）同ERROR嘅肥仔（梁業）都有留言打氣。

MIRROR演唱會舉行前，有傳多位舞者喺社交平台出post，就舞台安全表達不滿，更有傳綵排時有樂隊成員及舞者墮台受傷。Zisac提到「呢個Show 雖然最後無上過台on performance」，似乎間接證實佢喺正式演出前嘅綵排已經受傷，因此正式演出時未能上台。但到底Zisac受傷係咪因為舞台機關導致，就需要再進一步證實。

上星期四MIRROR演唱會的屏幕墮下事故中，舞者阿Mo被屏幕擊中傷重危殆。曾被以為事故中受輕傷嘅阿峯，家人透過教育界KOL「呂校長」表示阿峯出院後轉到私家醫院治療，而且傷及頭部、盆骨及腳趾，醫生更表示阿峯嘅傷勢會「有手尾」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！