連詩雅寧願得棚骨忍到抑鬱

擁有43吋長腿、模特兒身形的連詩雅（Shiga），自爆為食是致命傷。回憶當年減肥血淚史，她向來享受美食帶來的歡愉，偏偏為了體形而忍口，更因過度節食幾乎搞到有抑鬱。

為了上鏡更好看，Shiga五、六年前試過不健康的減肥，她說：「一日食三包梳打餅，又試過連續兩星期三餐都食粥，最後粥都唔食，只係食粥水，嗰時瘦到得番102、3磅，以我高度嚟講係超級唔健康，最慘我塊面特別包包，個身就算得棚骨，塊面上鏡只係啱啱好。」過分節食易罹躁鬱症、焦慮症，甚至抑鬱症，她說：「個人好易忟唔開心，又瞓唔到，嗰時唔知點解，當我享受到食物畀我嘅快樂，我就明白囉。」

暗藏鬼祟脂肪

近日健身中心重開，Shiga開心終可操肌，之前她宅在家中亦不忘運動：「做開運動嘅人好身痕嘅，於是善用啲櫈、物件郁吓。」曾經讀過健身課程的她知道飲食好影響身形，她自爆好為食，身上暗藏鬼祟脂肪，她說：「想操肌肉線條，唔可以食煎炸、太濃味或者太多糖嘅嘢，但呢啲都係我致命傷嚟。」如果毋須拍廣告或者相關影相的工作，她笑言會放鬆一些：「我寧願做番多啲運動去化解我想食嘅嘢，因為有時真係太拘束，好辛苦。」

愛到戶外運動

其實Shiga到健身室做gym是迫不得已，因為她不喜歡在冷氣地方做運動，她說：「我好難出汗，做運動唔出汗好唔舒服。」平日她最愛到公園跑步，覺得跑步是一個好舒服的獨處時間，她笑說：「我宅得同獨得，係獨處吖，唔知係咪獨女，做完嘢我好鍾意一個人匿埋，好需要個人空間。」