Yahoo奇摩新聞 【時裝界撤資潮殺到?】 零售寒冬....Jack Wills、SPAO全面撤出香港
近呢兩個月香港社會氣氛陰霾密佈，估唔到時裝界亦有唔少壞消息!韓國最大服裝集團ELAND旗下Fast Fashion品牌SPAO、WHO.A.U及SHOOPEN陸續撤出香港，連深受年輕人歡迎嘅Jack Wills香港分店亦突然全線結業，以後想買要去旅行或者搵代購先得喇！
1.Jack Wills
成立於1999年，以高品質、傳統風格嘅經典服裝做主打，於2011年登陸香港。品牌服飾充滿英倫風，一直深受年輕人歡迎，簡約款衛衣、tee同埋淨色針織冷衫向來係熱賣，簡單左胸配個品牌logo仔，易襯又長青，仲有唔少女生專登揀嚟同男友襯情侶裝!
位於銅鑼灣間旗艦店裝修都好有英倫feel，上下兩層好闊落，行得舒服，試身室仲設計到成間睡房咁，試完衫都唔捨得走!可惜日前Jack Wills英國總公司已申請清盤，被另一間英國運動零售公司Sports Direct收購，聲明指出Jack Wills處於財困，舊年錄得約1420萬英鎊(約1.4億港元)虧損，今年更擴大至2930萬英鎊(約2.9億港元)!外媒報導指是次收購只包括6間中東地區海外分店，好可惜並冇提及香港，希望之後會有好消息啦!
消息傳出後，銅鑼灣禮頓中心、沙田新城市廣場、元朗Yoho Mall、尖沙咀海港城LCX及九龍塘又一城5間分店已即時停止營業，連網店都入唔到，我自己就特別鐘意品牌招牌粉紅拼海軍藍間條嘅產品同埋家品小物，唯有搵代購或者旅行先買!
2.SPAO、WHO.A.U
韓牌SPAO及姊妹店WHO.A.U於8月頭喺Facebook專頁宣佈將會結束營業，而同集團另一鞋袋品牌SHOOPEN亦正式於上個月結束本港唯一分店，小資女又少咗幾間買平衫嘅舖頭喇!
近年韓風盛行，2014年尾韓國服裝集團ELAND旗下服裝品牌SPAO、WHO.A.U、TEENIE WEENIE首次來港選址荃灣愉景新城開店，鞋袋品牌SHOOPEN及家品店Modern House亦於2015年初進駐!可惜幾年過後，TEENIE WEENIE、Modern House及SHOOPEN相繼結業，淨返嘅SPAO同埋WHO.A.U亦預計於8月尾結束營業，意味呢個韓國最大服裝集團即將全面撒出香港!
當中又以SPAO最吸引年青人，服飾風格走休閒隨性路線，加上價錢夠平，買多幾件衫都唔肉痛!但之後亦有唔少用家覺得品牌服裝質素越出越差，加上韓國SPAO經常有唔同嘅crossover系列，好似蠟筆小新、百變小櫻、美少女戰士同埋最新Harry Potter精靈多比（Dobby）及阿拉丁系列等，全部都好有回響，但呢啲Crossover都只係韓國出售，香港買唔到，少咗話題產品，亦係SPAO香港店嘅致命傷!
即日起SPAO及WHO.A.U推出全場半價優惠，精選清貨貨品仲會去到2折，想買衫要把握最後機會喇!
圖片來源 ： Jack Wills、ELAND
更多相關文章
Majolica Majorca年底前撤出香港！跟皇牌睫毛膏說再見！
