【前夫訪問】宣告關閉關注組迴響遠超預期 惜未能帶來改變：我已經盡力

Mirror熱潮勢不可擋，廣大女粉絲為之瘋狂，其另一半更自嘲「前夫」。Facebook群組「我老婆嫁左比Mirror導致婚姻破裂關注組」版主RC早前不滿Mirror演唱會售票等安排，宣告關閉群組，即使ViuTV高層來電也未能打動他。豈料演唱會發生嚴重意外，鏡粉以至整個社會正經歷集體創傷，他今天宣佈暫緩關組。RC早前接受《Yahoo新聞》訪問時，分享成為前夫版主的心路歷程，當初決定關組，迴響遠超預期，惜未能帶來改變，「試咗、盡咗力就OK喇」。目前他只希望受傷舞蹈員盡快康復。

記者：Carmen C.

開group讓前夫「圍爐」

RC去年開設群組原意是讓一眾前夫「圍爐」，沒料到成員人數累積至35萬人。RC笑言，正因開設群組時沒想太多，群組內容才會如此貼地和反應熱烈，「就好似有啲電視台要特登捧紅一班兒童，結果反而令大家反感」。

RC的太太是「姜糖」（姜濤粉絲），因家中換上姜濤代言洗衣機的帖文打響名堂。RC其後以版主身份任ViuTV節目嘉賓，並在個別品牌廣告客串。RC今年6月卻在群組投下「震撼彈」，宣佈因不滿Mirror演唱會主辦機構的售票安排，決定在演唱會後永久關閉群組。

該帖文引起網上哄動，獲4.9萬個讚好，令RC更認同此決定，「原來唔係得我有呢個感覺，其他人都有，多謝支持，一切在心中」。不過亦有成員深表可惜，覺得失去一個分享趣事的園地，RC百感交雜，「我係有內疚嘅，因為我想大家都開開心心，但我嘅決定就令大家失望」。

「我係想有迴響，但都無諗過咁大」

RC最不滿贊助商的行銷方式，「HKT個抽飛嘅活動，我本身已經無限上網，你仲要我加$300買300GB把鬼呀？仲要畀$500幾開多個number上台，仲要一次過full pay…做咩啫？好等錢使咩？」他曾與群組其他管理員商討應否關閉群組，「如果閂Group係有正面效果，咁就值得嘅...我係想有迴響，但都無諗過咁大」。ViuTV製作部副總裁金廣誠更因此來電，RC不便透露雙方傾談內容，僅稱對方大概是想了解其看法，「我相信佢接收到我嘅意見，但今次演唱會好多嘢都已成定局，睇下未來嘅活動可唔可以改正返啦」。RC在過程中未有回心轉意，「無動搖，因為細個有聽過狼來了嘅故事」。

有Mirror歌迷會（Miro）成員自嘲為「ATMiro」（意指被視為ATM提款機），RC認為某程度是供求問題，「如果覺得貴嘅就唔好買，下次可能會平啲㗎啦」，「唔團結，就解決唔到個（黃牛）問題」。他強調「選擇權永遠喺自己度」，「大家有獨立思考、分析能力，如果覺得值得嘅咪繼續支持囉，唔鍾意嘅就閂埋個銀包佢都得㗎！」

有人質疑，RC擬在演唱會後才關閉群組，旨在「搵著數」。他則澄清，其太太已有演唱會門票，只希望一眾前夫可在關注組的「最後日子」分享另一半在演唱會的追星趣事。」

雖然當初關組決定引來巨大迴響，惜演唱會安排始終無大改變，「已經用咗我最大嘅bargaining power，試咗、盡咗力就OK喇！」Mirror演唱會由購票安排、Miro入會機制、周邊產品發售安排，以致舞台設計及歌手安全問題等，都為人垢病。是次訪問在演唱會開騷前進行，豈料第四場發生大屏幕墜下事件，舞蹈員重傷。RC事後向記者表示，現階段只希望傷者盡快康復，「其他嘢之後再算啦！」