不正常愛情研究所｜文頌男椎間近盤骨發現惡性腫瘤 全面停工出IG Story籌集醫藥費 網民紛紛留言打氣

J2節目《不正常愛情研究所》主持之一嘅文頌男（Koba），已經有一段時間未有喺節目中亮相，而近日佢就喺IG出PO公開原因，原來佢喺幾個月前確診患癌，喺椎間近盤骨附近嘅位置有一個大概6×6×4厘米嘅惡性腫瘤，現時全面停工休息及開始化療。

文頌男喺IG上載照片，並留言話：「好耐冇見大家喇！其實我病咗吖！！應該都有兩個月冇更新過近況，我幾個月前確診自己有癌症，依家有一個大概6×6×4cm咁大嘅惡性腫瘤喺我嘅椎間近盤骨附近嘅位置，因為壓住咗啲神經，所以行動唔方便同週不時會劇痛。我由兩個月前左右已經全面停工休息，最近仲開始咗化療，希望好快可以好返，繼續拍唔同嘅嘢畀大家睇。暫時我都好正面面對，大家唔洗擔心，都好多謝呢幾個月嚟不斷陪我出入醫院、照顧我嘅所有朋友們，冇你哋真係搞唔掂，最近收到好多大家打氣嘅訊息，好多謝大家支持，我知大家都好關心我，可能好多嘢都想問我、了解吓我近況，歡迎大家留言畀我，可能有機會拍吓啲REELS回應返，同畀大家了解吓我近況啦！」

唔少網民得知佢患癌消息後，紛紛留言為佢打氣，「加油，日後LGBT平權既路都要靠你這些勇士帶領，你一定會好返」、「加油 會捱過去架」、「冇事的，等你出返嚟拍嘢！」、「加油呀koba仔」、「保重身體，祝早日康復」、「好快好番，加油。最緊要心情開朗，免疫力系統會自動上升。加油」、「koba加油！早日康復，Pray for u .」、「祝早日康復，等你番j2主持不正常愛情研究所」、「祝你早日康復. 好好保重身體」、「早日康復 想再見到活躍於幕前既你」及「Praying for your recovery it must be very hard but we are all praying for you」等等。

積極面對病情嘅文頌男，現時處於全面停工，但又要應付醫療費用，相信有一定嘅經濟壓力，所以佢亦有喺IG以黑底白字形式更新限時動態，希望大家可以捐款籌集醫藥費：「I hope you’re doing well. I wanted to reach out and ask for your support in my ongoing battle with my medical condition. Your donation would mean the world to me and give me the strength to keep fighting. I truly appreciate any amount you can contribute. Your support will make a significant difference in my journey towards recovery.（希望你近來過得很好，我想在我與健康狀況的持續鬥爭中尋求你的支持。 你的捐款對我來說非常重要，並給我力量去繼續戰鬥。 我會真誠地感謝你貢獻的任何金額。 你的支持對我的康復之路產生有重大的影響。）」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！