[乜又係你呀] 四套劇連住播 劉佩玥上位有望？

2013年度香港小姐三甲，冠軍陳凱琳、亞軍蔡思貝、同埋季軍劉佩玥入行後獲無綫力捧，劇接劇未停過。雖然劉佩玥（Moon）冇陳凱琳同埋蔡思貝咁幸運可以跳級做女一，不過有好多觀眾反而覺得做配角嘅Moon更加順眼！有網友更加發現原來Moon由今年年頭嘅《EU超時任務》到而家熱播中嘅《城寨英雄》四套劇都keep住見到佢！

Moon有份出演嘅劇集今年一套接一套咁播。除咗外購劇《琅琊榜》，由三月《EU超時任務》飾演有錢𡃁模賀小美，到四月播出嘅《殭》飾演Cool爆助手 Rosa，再到6月《一屋老友記》飾演細寶暗戀嘅鋼琴老師呂星晨，最後到而家熱播中嘅《城寨英雄》中飾演城寨賭王千金 Audrey，幾乎晚晚9點半都見到Moon！

雖然套套都係做配角，但網友大讚劉佩玥演技自然，外表順眼又親切。但同時亦有網友直言Moon戲路窄，成日都係做大小姐角色。網友話Moon演技都仲係幼嫩，仲未係時候擔正做女主角，不過大家都睇好Moon有潛質，只要花時間磨練演技，一步一步爬上去，擔正做女一不是夢！

Moon喺Instagram上載咗三張劇照，原來喺《EU超時任務》、《殭》、同埋《城寨英雄》中Moon同林偉都有對手戲，又幾有緣喎！