亞洲超星團丨丁子朗MV獲安排獨白 Cosplay《海賊王》索隆曬胸肌被質疑造假

TVB全新偶像選秀節目《亞洲超星團》將於下周六（25日）播出，優酷國際版將同步上線。節目雲集65位來自內地、香港、澳門、台灣、日本及韓國等地嘅「超星練習生」，致力打造一隊具影響力嘅男子組合。繼參賽者宣傳照及宣傳片曝光，昨日（13日）官方又再釋出主題曲《閃耀/Shining》完整版MV及部分練習生演出精華，MV中僅得3人獲安排獨白鏡頭，其中包括公開參賽以來備受爭議嘅丁子朗；丁子朗又於社交平台分享Cosplay《海賊王》卓洛（索隆）嘅爆肌照，被網民質疑嗰條胸肌線係咪畫上去。

《亞洲超星團》香港代表包括丁子朗、黃奕斌、冼靖峰、文佐匡、洪欣兒子張鎬濂、歐陽妙芝兒子方玉亨、區珀豪及余宗遙。於《閃耀/Shining》MV中，丁子朗與內地大熱奧利及日本代表路己均有獨白鏡頭，不過一到團隊Shot，見到丁子朗僅被安排企側邊，眼力唔夠都幾乎睇佢唔到。相反，《聲夢傳奇》出身嘅黃奕斌出鏡率係香港代表之中最多，冼靖峰及余宗遙亦有大頭鏡頭。而企正C位嘅就係唯一澳門代表：男團BOYHOOD成員江信熹，盡顯受寵地位。

丁子朗自從宣布參賽到宣傳照出街，網民都難以接受佢嘅新造型，除咗極重手嘅煙燻眼妝，將黑髮染成金毛嘅佢更被指改頭換面，成個泰仔咁款，過往乖乖仔形象不再。日前，丁子朗上載Cosplay《海賊王》卓洛（索隆）嘅造型照，除咗化上過白嘅底妝，仲大曬胸肌，但網民似乎對濃濃嘅脂粉味唔受落，更質疑其胸肌係造假：「肯定有畫shadow」、「看著有點像腹肌衣服」、「好核突，sorry」、「胸肌好像畫的」、「可唔可以變返以前嘅丁丁」、「希望丁子朗可以快啲淘汰」、「塊面太白了吧」、「走火入魔了 今次個妝直頭係藝妓」、「誰給你化的妝，好歹毒」等等；不過都有網民表表示鍾意丁子朗呢個造型：「條線真定假 個個都話之前個丁丁點好 宜家點差點差（個look） 但我都好鍾意宜家呢個形象喎」、「Omg身材很好」、「深夜福利是吧」、「每次新嘗試都會有驚喜。正到。繼續期待」、「嘩原來咁大隻」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！