任達華因禍得福獲女神安祖蓮娜慰問

影帝任達華上月在內地遇襲受傷後，昨日首次在港出席公開活動，見他心情輕鬆主動走向人群，他直言受傷後感到世界有愛，獲妻女貼身照顧及朋友關心，最開心是女神安祖蓮娜祖莉都有問候他！

任達華上月20日到中山出席活動時遇襲，腹部及右手受傷，日前他極速復工到廣州出席宣傳活動，獲安排數十名保安人員傍實。昨日傍晚，他在九龍灣出席「萬希泉x《小Q》視障人士愛心場」，是他受傷後首次在港出席公開活動，現場有兩名保安跟身，氣氛不算緊張。

戴足八星期手托

右手戴上托手保護器的任達華由抵步到儀式開始表現從容，主動走向贊助商及嘉賓堆中寒暄。其後受訪時，由經理人負責拎咪，他表示一直有覆診：「點都要做半年至九個月，至於右手手托至少要八星期至除得低，依家未好番o架！至少八星期唔可以運動，但我太鍾意套戲，所以要出嚟宣傳！太太同個女都瘦咗，佢哋掛住煮嘢畀我食，好多滋潤，反而我肥咗。（肥咗幾多？）一磅幾！對我嚟講好多喇！」

他又指獲曾合作的荷里活女星安祖蓮娜祖莉（Angelina Jolie）問候，相當開心：「佢係我女神！我都有覆佢『多謝關心』，仲有法國、歐洲影迷都有訊息我！我仲要多謝醫護人員同楊生（英皇老闆楊受成）支援。（幾時復出拍戲？）最快做番運動先，要最佳狀態先再拍，電影公司都應該明，依家盡量陪家人，以前實在太忙喇！會同阿女出埠，去邊就等個女通知，如果短廣告，拍一、兩日都得嘅。」

走近人群唔識驚

提到日前到廣州出席活動，他表示太太琦琦相當擔心，但也贊成宣傳正能量電影，並指之後在內地工作都會加強保安：「我唔會因為咁而唔走向人群，人與人要接觸、要有愛，向前看啦！（點解今次冇加強保安？）香港吖嘛！同埋有你哋（記者）陪我。」

同場的歌手鄧小巧首次演戲，直言相當開心，提到電影以動物為主題，她透露與家姐有收養五隻流浪貓。