你好我的大夫 ｜5大情節被狠批唔合情理 孔德賢患癌依然係靚仔樣？

TVB劇集《你好，我的大夫》描繪中西醫於醫療體制之間嘅矛盾，並即將於本周五（13日）播出大結局。日前劇情講到蔡思貝被停職及與何廣沛共同照顧於ICU留醫嘅嫲嫲，令觀眾對佢哋嘅感情線大感期待。不過，《你好，我的大夫》近日就被觀眾狠批5大劇情唔合情理。

犯駁位1：區明妙被賣後僅被影裸照？
第19集講到麥寶（區明妙飾）畀獸父（李啟傑飾）捉咗，獸父為咗搵食更加將區明妙賣畀不法份子，區明妙被3名壯漢灌藥後，僅被影裸照，網民直言唔合情理，直指3名壯漢會唔會咁好人放過區明妙，而區明妙事後亦無報警，令人表示劇情突兀。

犯駁位2：孔德賢癌症復發無人發現？
無論係於政府診所，定係自己開私人中醫診所，「六君子」都經常聚埋一齊，但就無一個人發現Ed師兄（孔德賢飾）身患癌症，直至孔德賢暈咗入院並由Honey（楊玉梅飾）爆出情況，眾人先得知真相。對此，網民就直言點解5個中醫都睇唔出孔德賢有末期癌症。

犯駁位3：孔德賢患癌依然係靚仔樣？
當癌症擴散至末期，患者都會因癌症及化療藥物「元氣大傷」，最常出現嘅症狀包括倦怠、疼痛、厭食、便祕、失眠、焦慮不安及憂鬱，但卻無見到喺孔德賢出現倦怠、消瘦、食藥嘅狀況，相反更可以做到中醫睇症，與《破毒強人》陳豪所飾演嘅末期癌症病人大為不同。

犯駁位4：何廣沛蔡思貝唔識避孕？
日前劇情提到蔡思貝曾流產，而BB爸爸就係何廣沛。網民直指，即使二人當時仍係學生，但修讀中醫嘅佢哋無理由唔識避孕。又指，蔡思貝和何廣沛感情線過份拖拉，建議一係一齊一係就唔好再理對方；而蔡思貝於劇集中錄音講晒自己秘密出嚟，再畀何廣沛發現一幕，觀眾就大斥奇怪，表示會唔會有人會咁樣錄低自己啲秘密。

犯駁位5：過份Hard sell谷婭溦片尾曲
《你好，我的大夫》除咗不時植入贊助商廣告，更加狂播谷婭溦獻唱嘅片尾曲《不會道別》，網民紛紛表示過份Hard sell。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！