內地網民出PO公審陳山聰耍大牌 本尊大方回覆：真的不好意思了

現年47歲嘅陳山聰近年事業發展順利，憑劇集《金宵大廈2》勇奪「視帝」寶座，演技備受肯定。近日佢就前往內地拍攝新劇《分黑英雄》，有網民喺深圳偶遇陳山聰，不過就喺社交網站出PO聲稱要求合照被拒絕，直指佢耍大牌，結果釣出本尊現身回應！

有網民喺喺深圳偶遇陳山聰，並喺社交網站出PO上載偷影照片及直指佢耍大牌：「去吃飯，剛好遇上劇組準備拍攝，但是陳山聰真的好大譜（牌）……熱情打招呼當沒看見，走到跟前禮貌求問能否合照，繼續裝沒聽見，由身旁助手拒絕，全程冷臉，目中無人，下頭。」之後有唔少網民留言支持陳山聰，有人認為佢拍緊劇唔方便，亦有網民話佢一直都好熱情及寵粉，直斥呢位網民玻璃心、小題大做及「道德綁架」，而事後該網民就將PO刪除。

事件除咗吸引大批網民留言之外，連陳山聰本人都現身留言回應：「究竟發生什麼事情？什麼大譜？要跟誰道歉？我在門外等候了兩小時才能拍攝！真的不好意思了。」網民認為佢唔需要道歉，只係一個網民同唔到佢影相喺度抱怨，之後陳山聰大方回覆話：「哦明白了！如果是我也會抱怨的，下次再叫我拍吧。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！