【兩劇連住播】黃智雯演技獲網民激讚 再次成為視后大熱

黃智雯入行以來默默耕耘，近年終於成功躋身一線花旦，由佢擔正主演嘅《十八年後的終極告白》及《降魔的2.0》正在熱播中，一晚佔據兩個黃金時段。睇過佢嘅演出後，黃智雯成為觀眾心目中嘅今年視后大熱人選。

《十八年後的終極告白》進入高潮，劇情講到林朗生（譚俊彥）喺船上殺害「第八人」賴國明（唐嘉麟），點知誤殺咗被收埋喺船上行李箱嘅陳淑嫻（江欣燕飾），令到「Madam阮」阮麗瑾（黃智雯飾）嘅原本幸福美滿家庭破碎。之後，經歷喪母之痛嘅Madam阮，再一次同爸爸阮進（林嘉華飾）鬧翻，於是將感情寄託喺朗生身上，仲去咗林朗生屋企門口喊，希望依靠佢。

而《降魔的2.0》就喺上星期開始播出，劇情就講到女童巧兒（黃雪兒飾）因為將麵粉吸進鼻，所以到醫院求助，之後莊芷若醫生（黃智雯飾）意外知道巧兒被父母虐待，不過因為冇證據而放人。之後芷若除低咗有降魔能力嘅項鍊後，佢進入異度空間，仲見到巧兒。喺返回現實後，芷若就見到巧兒被父母打至奄奄一息，最後仲離世。芷若覺得愧疚難過，認為自己原本可以阻止悲劇發生，當場質問巧兒嘅父母。之後，芷若仲參加咗小馬嘅「的士探靈團」，去咗搵巧兒嘅屋邨居所查探，芷若同巧兒有心靈感應。最後巧兒得到芷若同小馬幫助，完成心願後消失。

唔少網民睇完黃智雯嘅演出後，大讚佢好戲及演繹動人，兩套劇都成功將傷心難過嘅場口發揮得淋漓盡致，仲話今年嘅視后好大機會係佢。網民留言：「暫時睇唔到有人可以同佢爭，一定係智雯攞」、「今年咁嘅排場都拎唔到，無可能」、「今年係黃智雯架喇」、「有機會」及「黃智雯D演技絕對有資格同班老戲骨花旦較量!!!!!」等等。

喺2018年，黃智雯憑劇集《三個女人一個「因」》中一人分飾三角，成為視后大熱，不過可惜最後未能奪獎，唔知今年佢有冇機會憑呢兩套劇集獲得視后寶座呢？