《八時入席》今星期大結局 咁新一輯處境劇有冇馬家份?

image

無綫處境劇《愛·回家之八時入席》搵咗毛舜筠幫手救收視,毛姐果然冇令大家失望,《八時入席》嘅收視有時仲高過8點半同9點半嘅劇集。雖然收視唔錯,觀眾更由因為冇馬家而罷睇去到家下唔捨得播完,劇中唔少配角都深受觀眾及網民歡迎。但係劇集喺今個月6(星期五)就大結局,之後就會播由李添勝監製嘅《財神駕到》。

image
image

咁播完《財神駕到》之後,有無新處境劇補上呢?有報道指處境劇御用監製羅鎮岳已經準備開拍新一輯嘅處境劇,劇名暫定叫《愛·回家之開心速遞》,預計2月尾出街,劇集繼續會以家庭為中心。叫「開心速遞」係因為而家好興網購,所以故事亦圍繞住一間百貨公司入面嘅網購部。

新一輯處境劇會有邊位演員參與?為咗保持神秘感,監製就話新舊演員都有,而《八時入席》部分演員會繼續參與新一輯嘅處境劇,過兩日就會試造型。有傳湯盈盈成功留低,第一輯嘅馬虎劉丹及呂慧儀亦會加盟,不過馬家成員馬強徐榮同埋馬子妮蔣家旻因為有其他劇喺身,所以未能接拍。睇嚟大家仲未有機會睇到馬家回歸啦~

image
image
image