前商台主持 獨立音樂人關勁松病逝 節目舊拍檔3年前同月同日離世
曾經主持商台文化節目《不設劃位》嘅香港獨立樂隊AMK主音關勁松,於上星期五晚(2/24)逝世,終年53歲。
關勁松(阿松)與麥海珊及許惠琛組成嘅AMK(Adam Met Karl)係90年代香港獨立音樂圈核心代表,其作品《請讓我回家》、《浪漫是你的本性》、《燦若繁星》等都係小眾心水,周國賢就曾經喺個人專輯收錄翻唱版《請讓我回家》。AMK亦曾為王菲《一人分飾兩角》作曲。後來AMK喺1996年解散,阿松轉為喺不同傳媒撰寫樂評及影評,並於2004年創立維港唱片,旗下嘅my little airport成為另一個年代嘅獨立音樂代表。而阿松近年回歸音樂圈,以樂隊「關勁松的Astrology」推出歌曲。
阿松曾為商台文化節目《不設劃位》擔任主持多年,但於2008年被指醉酒主持節目而遭解僱。接替阿松做《不設劃位》主持嘅樂評人袁智聰,日前喺facebook出post公布阿松逝世消息,提到同阿松一齊創立節目嘅音樂人亞里安(歐陽永康),係喺3年前嘅2月24日逝世。袁智聰難掩傷痛寫道「三年間的同一個日子,我相繼痛失了兩位相識30多年的好友,世事真的要那麼巧合嗎?」。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!