劇集電影大兜亂 雷神細佬走入公仔箱 《絕命毒師》上銀幕

有時真係搞唔清，一個故事有電影版又有電視版，係因為單純故事受歡迎，定係有錢賺唔好嘥要食盡佢？日本喺呢方面算係少數做得幾好下，即係電視同電影版都有可觀性，例如近期日本大收的《緊急救命》（Code Blue)，電影延續電視版嘅發展，講述由藍沢醫生（山下智久 飾）嘅空中拯救隊面對急症、危難關頭嘅故事。

同一個故事由電視翻拍成電影版嘅亦有唔少，好似韓國嘅《奶酪陷阱》，電視劇喺2016年成為TVN電視台全年收視亞軍，電影版除左男主角用返朴海鎮外，其他角色都換哂演員，都叫有少少新意。

美國方面自從有左Netflix之後，streaming平台競爭戰況非常激烈，特別當電影龍頭各自設立自己嘅streaming平台，好似日前Disney就宣佈佢地會從Netflix抽起所有作品，以後想係屋企睇Marvel系列，就要訂Disney嘅streaming頻道啦！

自己起個平台都要有返咁上下內容先夠撐，所以佢地已經落實將Marvel電影劇集化，第1個跑出就係《雷神奇俠》個細佬洛基（Loki）！洛基由首集《雷神奇俠》電影憑佢奸又奸唔哂、多多古惑少少可憐嘅設定成功跑出，Tom Hiddleston 仲因此一躍成為全球男神。

班fans早早要求為洛基獨立拍外傳，今次願望成真，仲要係電視劇，篇幅比電影長咁多，各位fans應該夠止渴啦啩？現階段無咩故事內容可以透露，不過洛基喺電影《復仇者聯盟：無限之戰》一開場就遭到Thanos嘅毒手，究竟劇集版嘅佢會翻生定會拍翻轉頭成為前傳？

另一邊廂仲有一套由電視跨入大銀幕，就係大熱劇集《Breaking Bad》，故事講述中年阿sir Walter White( Bryan Cranston 飾)因為身患絕症，為左搵多啲錢俾屋企人而運用化學知識製毒。劇集入面嘅Walter越來越心狠手辣，當時有口碑有收視，不過劇集2013年做到第5季就完左。5年之後先宣佈拍成電影版算唔算遲？不過Bryan Cranston就出哂聲話想拍，做返Walter White，你又想唔想睇呢？